Abategura Primus Guma Guma Super Star 6 bamaze kugena utwara igikombe?

Chief Editor | 13-08-2016
Abategura Primus Guma Guma Super Star 6 bamaze kugena utwara igikombe?

Kuri uyu wa Gatandatu tariki 13 Kanama 2016, nibwo hasozwa irushanwa rya Primus Guma Guma Super Star 6, gusa mu gihe habura amasaha macye ngo uwatsinze ahabwe igikombe cye, habaye ibintu biteje urujijo binaca igikuba mu bahanzi, bamwe babona ko igikombe cyamaze guhabwa nyiracyo mbere y’igihe.

Kuri uyu wa Gatanu tariki 12 Kanama 2016, nibwo umuyobozi wa EAP ifatanya na Bralirwa gutegura aya marushanwa, Mushyoma Joseph bakunda kwita Boubou, yohereje amajwi mu ihuriro (Group) rya Whatsapp ahuriramo n’abahanzi bahatanira aya marushanwa, aho yavugagamo abahanzi 5 ba mbere (Top 5).

JPEG - 166.3 kb

Mushyoma Joseph bakunda kwita Boubou, umuyobozi wa EAP ifatanya na Bralirwa gutegura aya marushanwa

Ibi bikimara kuba, abahanzi bose babonye ko Boubou yibeshye akohereza amajwi ahantu hatariho, ndetse igikuba kuri bamwe kiracika bibaza ukuntu abambere bamenyekanye mu gihe gutora ku butumwa bugufi byari bigikomeje ndetse hari n’ikindi gitaramo kigomba guhabwa amanota kuri uyu wa Gatandatu.

Muri iri jwi yagiraga ati: "Top 5 ni Urban Boys, Bruce Melodie, Christopher, Danny Nanone na TBB". Aya majwi akimira kumvikana, abahanzi bose babaye nk’abakubiswe n’inkuba bibaza ibibaye.

Ni uku byari byifashe ku rubuga rwa Whatsapp rw’abahanzi n’abategura aya marushanwa.

Ubwo ikinyamakuru Ukwezi.com cyaganiraga na Mushyoma Joseph bakunda kwita Boubou, yadutangarije ko uri rwari urutonde rw’uko abahanzi bagombaga gukurikirana mu gusuzuma no gukora imyitozo ku byuma baza kuririmbiraho, akavuga ko amarushanwa akomeje hatari hamenyekana uwatsinze.

Ibi ariko hari abahanzi benshi twaganiriye babifata nk’ikinyoma, kuko ubusanzwe batajyaga bakora urutonde rw’uko baza gukurikirana gukora imyitozo no gusuzuma ibyuma, ahubwo buri wese yagendaga abikorera igihe abonekeye. Bavuga ko Boubou yahise apanga ako kanya ko bagiye gukurikirana uko, bakabona yabikoze kugirango abone ibisobanuro atanga.

Ikindi bagaragaza nk’igikwiye gutekerezwaho, ni uburyo yakoresheje ijambo "Top 5" rigaragaza batanu bari imbere kurusha abandi, ntavuge uko abahanzi bose bakurikirana uko ari 10, kandi akabanza abahanzi 3 n’ubundi bahabwa amahirwe kurusha abandi yo kuba bakwegukana iki gikombe, abo bakaba ari Urban Boys, Bruce Melodie na Christopher.

Hari umwe muri aba bahanzi ariko wavuze ko yishimiye ibyakozwe na Boubou, kuko kuba yibeshye bigomba gutuma bahindura uko abahanzi 5 ba mbere baza gukurikirana kugirango bitamera nk’uko yabivuze bigateza ibibazo bishobora no gutuma bamwe bitabaza inkiko.

KANDA HANO UREBE VIDEOS UTASANGA AHANDI