AMAKURU

UKWEZI

Amwe mu mateka n’ibyaranze ubuzima bw’umuhanzi Rugamba Sipiriyani

Amwe mu mateka n’ibyaranze ubuzima bw’umuhanzi Rugamba Sipiriyani
2-05-2016 | By Chief Editor | Yasomwe n'abantu 1940 | Ibitekerezo

Rugamba yavutse mu mwaka w’ 1935 i Karama ahahoze ari muri komini ya Karama ku Gikongoro ubu ni mu Ntara y’ Amagepfo mu karere ka Nyamagabe. Rugamba yize amashuri abanza muri paruwasi ya Cyanika, ayisumbuye ayiga muri Seminari nto ya Kabgayi, akomereza muri Seminari Nkuru ya Nyakibanda. Yaje kujya muri Kaminuza ya Bujumbura aharangiriza icyiciro cya mbere cy’amashuri makuru.

Icya kabiri yakirangirije muri Kaminuza y’i Luve ho mu Bubiligi, ahavana impamyabushobozi ihanitse mu mateka. Rugamba yaje gukunda umukobwa witwa Mukangiro Saverina akaba yaramuhimbiye imitoma myinshi amurata imico n’ uburanga.

Uretse ko uyu mukobwa yaje kwicwa aroshywe mu mazi mu 1963, ibi bikaba byaramubabaje cyane, ariko yaje kwishumbusha undi witwaga Mukansanga Daforoza wari ubereye nyina wabo wa wundi wa mbere. Ni kuri izo ncuti ze ebyiri Rugamba yatangiriyeho guhimba ibisigo, twavugamo nk’ibyitwa Amibukiro, Cyuzuzo n’ ibindi byinshi.

Rugamba yari umuhanzi akaba n’ umusizi ukomeye dore ko azwi cyane muri bimwe mu bihangano bye harimo Amibukiro, Cyuzuzo, Umusogongero n’ izindi ndirimbo nyinshi zikubiye mu bitabo by’ indirimbo yagiye yandika.

Uyu mugabo kandi yashinze Itorero Amasimbi n’ Amakombe ryaririmbye indirimbo zisingiza Nyagasani ndetse zinigisha ku buzima busanzwe kugeza n’ubu rikaba rigihimba indirimbo zisingiza Nyagasani. Rugamba yaje gutabaruka azize Jenoside yakorewe Abatutsi mu 1994, akaba yari umuhanzi w’ indirimbo kurusha uko yari umusizi.

Ubu yibukwa nk’ umuntu wateje imbere ubuvanganzo nyarwanda ndetse akanafasha abakiri bato kumenya uko ururimi rwacu rwubakwa. Si ibyo gusa, kuko Kiliziya Gatolika n’ abandi bakristu yabasigiye ibihangano by’ indirimbo zisingiza Nyagasani zirimo ubuhanga buhanitse.


Tanga Igitekerezo
Ibitekerezo
IGURIRE
IBARUWA ZA JORIJI
URUKUNDO
INKURU ZIKUNZWE
IBIRORI
Ibitekerezo
IZINDI NKURU WASOMA