Bidasubirwaho, Christopher yamaze gutandukana na Clement ava muri Kina Music

Chief Editor | 22-08-2016
Bidasubirwaho, Christopher yamaze gutandukana na Clement ava muri Kina Music

Muneza Christophe, umuhanzi nyarwanda uririmba mu njyana ya RnB, yamaze gutandukana na Ishimwe Clement bakoranaga muri Kina Music, nyuma y’igihe kirekire akoreramo ibikorwa bitandukanye bya muzika, cyane ko Clement ari nawe wazamuye Christopher.

Ibi byemejwe na Christopher ubwe, wavuze ko baganiriye bagasanga ari ngombwa ko amasezerano y’imikoranire bari bafitanye bayahagarika. Yagize ati: "Nyuma y’ibiganiro hagati yanjye n’ubuyobozi bwa Kina Music birebana n’ahazaza hanjye muri Kina Music, impande zombi zumvikanye guhagarika amasezerano zari zifitanye. Kuva ubu inyungu zanjye ntizigihagarariwe na Kina Music." Ibi kandi byanemejwe na Ishimwe Clement.

JPEG - 54.2 kb

Christopher asize bagenzi be muri Kina Music

Indirimbo zose zamenyekanye Christopher yakoze, yabifashijwemo na Ishimwe Clement muri Kina Music. Byagiye bivugwa kenshi ko batandukanye ariko nyuma bombi bagafatanya kubihakana, kugeza kuri uyu wa mbere ubwo uyu muhanzi yabyitangarizaga.

Inzira ya muzika ya Christopher n’uko yahuye na Clement

Tariki 30 Mutarama 1994, zari impundu n’ibyishimo mu rugo rwa Butera Juvenal na Gahongayire Marie Nativitas ruherereye mu Nyakabanda mu mujyi wa Kigali. Bari bibarutse umwana w’umuhungu, mu minsi micye baba bamwise Muneza Christophe.

Uyu mwana w’umuhungu yakuze agaragaza imbuto y’urukundo rwa muzika, kuburyo ari umwana muto cyane, yiga mu mwaka wa gatatu w’amashuri abanza, Muneza Christophe yari afitiye muzika urukundo ruhambaye. Icyo gihe agitangira amashuri abanza, yaririmbaga muri Korali y’abana yo kuri Kiliziya ya Santarari ya Mutagatifu Kizito mu Nyakabanda.

JPEG - 255.9 kb

Uko yakuraga, yagendaga arushaho gukunda umuziki cyane maze atangira kujya yigana abahanzi bari bakomeye icyo gihe nka Corneille Nyungura, Cecile Kayirebwa, Michael Jackson n’abandi. Yagerageje ibintu byinshi yabonaga bishobora kumuzamurira umuziki, aho yagiye ashinga amatsinda y’abahanzi ashakisha imbaraga zatuma azamuka akaba umuhanzi ukomeye.

Urukundo yakundaga muzika rwatumaga ava mu Nyakabanda akajya i Remera n’amaguru

N’ubwo atari umuhanzi uzwi icyo gihe, Christopher avuga ko yari afite ijwi ryashimwaga n’abantu bari bamuzi neza, kuburyo hari mubyara we wigeze kumusaba ko yamuririmbira mu ndirimbo ye yari arimo gukorera muri Studio y’i Remera mu Giporoso, gusabwa ibi bikaba byaramushimishije kuko yumvaga ari amahirwe abonye yo kwimenyereza inzu zitunganyirizwamo indirimbo.

JPEG - 355.8 kb

Muri icyo gihe, Muneza Christophe yavaga mu Nyakabanda n’amaguru, agaca i Nyamirambo, akagenda akagera i Remera n’amaguru akaza no gutaha n’amaguru, ariko icyo gihe izo mvune ntacyo zari zimubwiye kuko yumvaga yifuza cyane kubona amahirwe yo kugera ahatunganyirizwa indirimbo. Yari afite inyota yo kuzavamo umuhanzi ukomeye, ariko yabonaga ari ibintu bigoye cyane kuko ntawe yari afite umufasha.

Bamwe mu bahanzi bagenzi be, yahoze yifuza kuba yakwifotozanya nabo

N’ubwo muri iyi minsi kubona Christopher ahagararanye n’abandi bahanzi bagenzi be wabibona nk’ibisanzwe ndetse ukabifata nk’aho ari ibyamamare bibiri byahuye, Christopher we yigeze no kugira inzozi zo kwifotozanya n’abahanzi nka Mani Martin, Meddy, The Ben na Aline Gahongayire, icyo gihe hari mu myaka ya za 2009 ubwo bo bari bamaze kumenyekana mu muziki.

Uburyo Christopher yahuye na Clement akinjizwa muri Kina Music

Mu kiganiro twigeze kugirana na Ishimwe Clement uyobora Kina Music, yadusangije inzira yamuhuje n’uyu muhanzi ndetse n’uburyo akimubona bwa mbere we na bagenzi be bamutangariye cyane. Mu mpera z’umwaka wa 2009 nibwo Kina Music yateguye amarushanwa yo gutoranya umuhanzi bagombaga gukorana mu myaka itanu yagombaga gukurikiraho. Abakemurampaka bagombaga gutanga amanota muri ayo marushanwa, bari abahanzi bakoranaga na Kina Music muri icyo gihe barimo Faycal, Miss Shanel, Aline Gahongayire na Ishimwe Clement.

JPEG - 128.4 kb

Abantu b’urubyiruko barenga 300 bari bitabiriye ayo marushanwa, muri abo hakaba haragaragayemo n’umusore w’imyaka 15 witwa Muneza Christophe, akaba ari nawe wemeje abakemurampaka bakamwibazaho nk’uko Clement abishimangira.

Clement ati: “Icyantangaje mu ndirimbo ebyiri Christopher yagombaga gukoresha ahatana, yabanje indirimbo ya Cecile Kayirebwa, nibaza umwana w’imyaka 16 uririmba indirimbo ya Kayirebwa kandi akayiririmba neza, sinjye byatangaje njyenyine n’abandi bakemurampaka byarabatangaje, birangira Christopher ari we utsinze. Nyuma yaho nibwo Kina Music yahise itangira gukorana nawe, abantu (public) ntibatinda kumva ubuhanga bwe, kuko ari mu bahanzi bakunzwe na benshi byihuse.”

Clement ntashima gusa impano n’ubuhanga bya Christopher, ahubwo anabona afite indi ntwaro y’inyongera izatuma agera kure mu muziki we, iyo ikaba ari imico n’ikinyabupfura bimuranga, kuburyo nta ngeso mbi ajya avugwaho cyangwa ngo agaragaze ibindi by’imyitwarire idahwitse.

Nyuma yo gutangira gukorana na Clement muri Kina Music, Christopher yateye imbere mu buryo bugaragara, agira indirimbo zakunzwe cyane ndetse atangira guhatanira ibihembo mu marushanwa ya muzika, n’ubu akaba aherutse kubona umwanya wa kabiri mu marushanwa ya Primus Guma Guma Super Star 6.

KANDA HANO UREBE VIDEOS UTASANGA AHANDI