Gitifu wa Nyakariro washakaga kurega Yanga, ibitutsi byatumye abireka aranicuza cyane

Chief Editor | 17-06-2016
Gitifu wa Nyakariro washakaga kurega Yanga, ibitutsi byatumye abireka aranicuza cyane

Nkusi Thomas uzwi cyane ku izina rya Yanga mu mafilime ari mu ndimi z’amahanga ariko asobanuye mu Kinyarwanda bakunda kwita Udusobanuye, mu minsi ishize ntiyari yorohewe n’ubuyobozi bw’umurenge wa Nyakariro bwamushinjaga gusebanya, nyamara iki kibazo cyari cyaramaze no kugezwa muri njyanama bakiyemeza kugana inkiko, bafashe icyemezo cyo kwicecekera bitewe n’ibitutsi batutswe.

N’ubwo akenshi Yanga akoresha amwe mu mazina y’ahantu hatandukanye mu Rwanda asa n’ushaka gusetsa abantu bakunda filime asobanura, mu minsi ishize yibasiwe n’ubuyobozi bw’umurenge wa Nyakariro, hamwe mu hantu akunda kuvuga cyane iyo asobanura filime, akavuga ibintu bitandukanye ku baturage baho aba agaragaza nk’abadasanzwe.

Karango Alphonse; umunyamabanga nshingwabikorwa w’umurenge wa Nyakariro wo mu karere ka Rwamagana, muri Gashyantare uyu mwaka yari yatangaje ko bagiye kujyana mu nkiko Yanga usobanura amafilime, bamushinja gusuzuguza no gutesha agaciro uyu murenge n’abawutuye, kuburyo bitera benshi ipfunye ryo kuvuga ko bakomoka i Nyakariro.

Icyo gihe yagize ati: "Yakoze ikosa ryo guharabika abaturage b’i Nyakariro kandi ni abaturage mbereye umuyobozi, kandi mu yandi magambo ninjye mugaragu wabo, bariya ubundi ni ba databuja. Ariko ubundi icyo yakoze ni ugusebya umurenge kandi agasebya n’abaturage b’uwo murenge abavuga nabi. Hari aho iyo urebye mu mafilime ye narakurikiye, aho avuga abana b’abakobwa ko ngo umukobwa w’i Nyakariro iyo akuramukije wagirango aragukandagiye. Ibyo rero, aba agereranya ikiganza n’ikirenge, urumva ko aba arimo asebya, kandi noneho akongera akavuga ko ab’i Nyakariro, amata bayasomeza avoka. Hari n’ibindi, filime ze zose zigenda zitesha agaciro i Nyakariro n’abantu baho, ibyo rero ugasanga ni nko gupfobya ikiremwamuntu. Byagaragariye henshi kuburyo umuntu w’i Nyakariro iyo ageze ahantu agatanga CV (umwirondoro), kumwe wibwira abantu uti njyewe ndi kanaka ntuye ahangana, iyo bumvise uri uw’i Nyakariro barakomera."

JPEG - 68.5 kb

Nkusi Thomas uzwi nka Yanga, yokejwe igitutu mu minsi ishize bavuga ko bazamujyana mu nkiko azira gusebya Nyakariro

Uyu muyobozi yavugaga ko gusebya aba baturage byabayeho kuva kera, nawe akaba yarasanze abaturabe bagira ipfunwe ariko akaba yaranemezaga ko njyanama yicaye ikabyigaho igasanga nta kindi gikwiye gukorwa uretse kugana inkiko. Yashimangiraga kandi ko ubu buyobozi butifuza uwabahuza na Yanga ngo biyunge kuko batamwinginga, ahubwo agashimangira ko kubera uburyo yabasebeje agomba guhanwa.

Nyamara amakuru yizewe ikinyamakuru Ukwezi.com gikesha umwe mu bakora muri uyu murenge wa Nyakariro utashatse ko amazina ye atangazwa, ashimangira ko ibyo kurega Yanga byapfuye ndetse uyu muyobozi akicuza cyane impamvu yabitangaje kubera ibitutsi abantu batandukanye bamututse haba ku mbuga nkoranyambaga no mu bitekerezo byatanzwe kuri iyo nkuru.

Uyu mukozi kandi avuga ko hari n’abaturage b’i Nyakariro biganjemo urubyiruko rukunda Yanga, batutse gitifu bakanamubwira ko guta igihe agana inkiko atari cyo babona kizateza imbere imibereho y’abaturage ba Nyakariro.

Ubwo ikinyamakuru Ukwezi.com cyageragezaga kongera kuvugisha uyu Karango Alphonse, yanze kudusobanurira byinshi ku mpamvu yatumye bararetse kurega Yanga ariko yemera ko koko bitigeze bibaho.

KANDA HANO UREBE VIDEOS UTASANGA AHANDI