Jack-B yasabye imbabazi yemera ko yabeshyeye umugore we ubusinzi n’ubusambanyi

Chief Editor | 13-09-2016
Jack-B yasabye imbabazi yemera ko yabeshyeye umugore we ubusinzi n’ubusambanyi

Umuhanzi nyarwanda Rugamba Jacques uzwi nka Jack-B yasabye imbabazi n’umugore we w’umuganga, Dr Juru Gisele bafitanye abana babiri, nyuma yo gushyira hanze amabanga y’ibyo mu rugo rwabo, ashinja uyu mugore we kurara mu tubari, gukururana n’abagabo bakize no kutita ku bana, hamwe n’ibindi yakoresheje amugaragaza nk’umugore udashobotse.

Mu butumwa yari yashyize hanze yandagaza umugore we, Jack - B yari yagize ati: “Ubu mwese mubimenye ntandukanye n’uwo nabyaranye nawe ibindi muzabimenya, ubu ndigenga... Harya ngo uri za bakire nirirwa ndera abana banjye? Harya ngo urantunze? Muzika twamenyanye nyikora, kugeza aho ntagikora na video n’imwe kubera kwitanga, abana ntibanakuzi mbivuganye umujinya kandi mbabaye... Sinkeneye guheka abana uri mu bubari wasinze, narakubashye cyane ariko ubu gumana n’ibigabo byawe by’ibisaza nta n’isoni... Narababaye bihagije, mfashe gahunda nanjye ku giti cyanjye ,Gisele Juru ntandukanye nawe uzagumane n’abanyamafaranga njye nta kazi ngira niyo nzize ubwiyemezi n’ubusinzi ndagiye ariko...”

Nk’uko yari yamwandagaje abinyujije ku mbuga nkoranyambaga, Jack-B n’ubundi yongeye gusaba imbabazi uyu mugore we abinyujije muri izi nzira, asaba imbabazi n’umuryango wose ku kuba yarahubutse.

Yagize ati: "Cherie twakundanye Facebook, Whatsapp na Instagram bitarabaho, nakoze amakosa akomeye gusa sinatekereje ku buremere bw’ibyo nandikaga ndetse nirengagije n’uwo ndi we kuko sinatekerezaga ko ibintu nanditse bishobora kugera aho byageze. Ibyo natekerezaga byose ni wowe nagombaga kubibwira, nagusize icyasha, nakisize ngisiga umuryango muri rusange, kugeza ubu ndumva ndi igicibwa kuri wowe, ngusabye imbabazi mbikuye ku mutima rukundo rwanjye Juru. Twasezeranye imbere y’amategeko gusa sinahemukiye gitifu cyangwa undi wese wadusezeranyije, nahemukiye umutima wawe n’uwanjye. Umbabarire wowe, inshuti zanjye nzisabye imbabazi, umuryango wanjye muri rusange ndetse n’abandi bose bamfashe ukundi kuntu...Imana by’umwihariko yampuje na Gisele nyisabye imbabazi. Juru Gisele uri umugore wanjye kandi uri ubuzima bwanjye."

JPEG - 92.2 kb

Dr Juru Gisele, umugore wa Jack B yashinjaga uburara

Uyu muhanzi kandi yakomeje agaragaza ko ibyo yavuze ku mugore we byari ukumubeshyera, asaba imbabazi n’ababibonye bakamufata ukundi.

Jack-B ati: "Rimwe na rimwe mu buzima hari ibyo umuntu abona cyangwa akabibwirwa akaba yabifata uko bitari. Umugore wanjye ni umwere imbere y’Imana n’imbere yanjye.
Ngusabye imbabazi kuba nahubutse nkavuga ibitari byo nanjye sinari ngambiriye kukubeshyera gusa byabaye umbabarire ndi umuntu, nakosheje cyane. Mbishyize aha n’ubundi kuko ariho nabinyujije nkubeshyera, abankunda n’abankurikirana mumbabarire. Itangazamakuru naryo ndisabye imbabazi kuba natumye rikwirakwiza ibitari byo, umuryango wanjye by’umwihariko ababyeyi n’abavandimwe ba Gisele hamwe n’abana banjye nabo mbasabye imbabazi. Murakoze kuba mumbabariye."

Umugore wa Jack B asanzwe ari umuganga, ndetse uyu muhanzi yavugaga ko amurataho ubukire

KANDA HANO UREBE VIDEOS UTASANGA AHANDI