Jay Polly aratabaza Polisi kubera ikiyobyabwenge kirembeje mugenzi we Fireman

Chief Editor | 1-08-2016
Jay Polly aratabaza Polisi kubera ikiyobyabwenge kirembeje mugenzi we Fireman

Benshi mu bahanzi nyarwanda cyane cyane abakora injyana na Hip Hop bajya bavugwaho gukoresha ibiyobyabwenge, ndetse rimwe na rimwe bakabyiyemerera, mu gihe icyo ari icyaha gihanwa n’amategeko y’u Rwanda. Ubu umuhanzi Jay Polly, aratabariza bamwe mu bahanzi babaye imbata y’ikiyobyabwenge kitwa ’Mugo’, by’umwihariko agatabariza mugenzi we Fireman bakoranye muzika cyane muri Tough Gangs.

Mu minsi ishize, Fireman yasohoye indirimbo yitwa Sagihobe yibasira Jay Polly, avuga uburyo abo mu itsinda rya Tough Gangs bamufashije yamara gutera intambwe akabicaho, ibintu Jay Polly yisobanuye avuga ko Fireman ibyo avuga abiterwa no kuba akoresha ikiyobyabwenge cya Mugo, bivugwa ko kibasiye abahanzi cyane muri iyi minsi.

JPEG - 33.5 kb

Jay Polly atabaza Leta y’u Rwanda by’umwihariko Polisi y’igihugu, ko bamenya ko iki kiyobyabwenge kimereye nabi urubyiruko kandi hatagize igikorwa kikaba cyazica ejo hazaza h’u Rwanda. Ibi yabinyujije mu kiganiro C FM Vibe kuri Contact FM.

Jay Polly ati: "Njye ndi intore, ndi indatabigwi,... ikintangaza, ni nk’ukuntu Fireman asigaye anywa mugo kandi yitwa ngo ni intore. Biriya bintu sinzi ukuntu bifata umuntu. Ariko Leta, Polisi imenye icyo bita mugo, ni ikibazo kibangamiye u Rwanda rw’ejo hazaza... Njye nk’intore mumenye ko dufite ikiyobyabwenge kitwa mugo, gikomeye cyane kiri kwica urubyiruko."

Jay Polly avuga ko n’ubwo Polisi y’u Rwanda isanzwe irwanya ibisindisha, urumogi n’ibindi biyobyabwenge, iki kitwa mugo na Fireman akoresha gikwiye guhagurukirwa no gukurikiranwa by’umwihariko kubera uburyo cyangiza ubuzima bw’ugikoresha.

KANDA HANO UREBE VIDEOS UTASANGA AHANDI