Kidum utinya kwicwa yishinganishije, ahura na Nkurunziza amusaba kwiyunga n’u Rwanda

Chief Editor | 6-09-2016
Kidum utinya kwicwa yishinganishije, ahura na Nkurunziza amusaba kwiyunga n’u Rwanda

Uruzinduko rwa Kidum mu gihugu cye cy’u Burundi, rukomeje guhangwa amaso n’abakurikirana cyane ibya Politiki y’iki gihugu, dore ko akomeje guhura n’abanyepolitiki bakomeye barimo na Perezida Nkurunziza, gusa akaba akomeje kwishinganisha avuga umuntu uzabibazwa naramuka yishwe.

Mu butumwa burebure yashyize ku rubuga rwa facebook, Kidum yasobanuye ko yahuye na Perezida Pierre Nkurunziza bakaganira kandi bakaba bagiranye ibiganiro byiza, akaba yamusabye ko umubano w’u Burundi n’u Rwanda wakongera kumera neza. Aha ariko, yongeye kwikoma uwitwa Bob Rugurika utavuga rumwe n’ubutegetsi bwa Nkurunziza, avuga ko naramuka apfuye ari we uzabibazwa.

Kidum aha yari kumwe na Perezida Nkurunziza w’u Burundi

Kidum ati: "Si ubwa mbere mpura amaso ku maso n’abagiye bayobora u Burundi. Kuva kuri Pierre Buyoya, Domitien Ndayizeye, Pierre Nkurunziza na Sylvestre Ntibantunganya twigeze guhura turaganira. Ahubwo ndatangaye cyane kubera ibiganiro nagiranye na Perezida Nkurunziza, ni amahoro gusa. Namusabye nk’umuririmbyi ko umubano mwiza hagati y’igihugu cyacu n’u Rwanda byasubira kumera neza kandi no kuri Radio Ijwi ry’Amerika nabisubiyemo ejo mu kiganiro yagiranye na Frederic Nkundikije. Igihe nari mu Rwanda nagiye kuririmbayo muri Nyakanga uyu mwaka, hari bamwe banyihaye aha i Bujumbura ngo nagiye kuririmbira abarwanya Leta y’u Burundi, mbasubiza ko njyewe akazi kanjye ari uguhuza imiryango no kubanisha abantu. Ubu nabwo naje i Bujumbura, ariko nagawe n’abatavuga rumwe na Leta kandi bazi neza ko aha i Burundi ari ho hakenewe amahoro gusumba ahandi. Nagirango ntange urutonde rw’abantu bakomeye ku isi kandi bubashywe baje i Bujumbura guhura amaso ku yandi na Nyakubahwa Pierre Nkurunziza ariko abatavuga rumwe na Leta bo bakabona ko ibyo ari byiza kurushaho. Ban Ki Moon, Samantha Power , Yoweri Museveni, Benjamin Mukapa n’abandi benshi b’abakuru b’ibihugu. None njye mubonye nkamusaba ko amahoro yagaruka akimakazwa muri bose ikibazo ni ikihe? Cyangwa Bob Rugurika yabonye ko ntacyo maze kuko ntari umuzungu? Ningira icyo mba ni wowe ukwiye kubibazwa Bob, na Leta reka nyibwire nihagira icyo mba."

Kuri iyi foto, Kidum yavugaga ko arinzwe bikomeye, nyuma yo kubona ko Bob Rugurika ashaka kumwivugana

Uyu Bob Rugurika, ni umwe mu batavuga rumwe n’ubutegetsi bwa Nkurunziza ndetse akaba aba mu buhingiro. Uyu kandi yanahoze ayobora Radio yigenga yo muri iki gihugu yitwa RPA. Bob Rugurika, yari yanyujije kuri twitter ubutumwa bugaragaza ko Kidum yabaye igikoresho cya Leta ya Nkurunziza, avuga ko yajyanywe mu Burundi no kwifashishwa n’iki gihugu ngo ahamirize amahanga ko i Burundi hari amahoro.

KANDA HANO UREBE VIDEOS UTASANGA AHANDI