Kidum yagaragaje agahinda n’umubabaro yatewe n’ibyamubayeho mu Burundi

Chief Editor | 6-09-2016
Kidum yagaragaje agahinda n’umubabaro yatewe n’ibyamubayeho mu Burundi

Nyuma y’iminsi abiri Kidum akoreye igitaramo gikomeye i Burundi, yagaragaje agahinda yatewe n’ibyo yahuye nabyo nyuma y’iki gitaramo, agaragaza ko hari abatarifuzaga ko ajya gutaramira abarundi, ndetse akaba yaboneyeho guhishura ko hari barumuna be babiri bafungiwe kuba baragaragaye mu myigaragambyo yamagana manda ya gatatu ya Nkurunziza.

Nk’uko yabitangaje abinyujije ku mbuga nkoranyambaga, Kidum avuga ko yababajwe cyane no kubona hari abamuziza ko ashaka guhuza abarundi. Yagize ati: "Mbabajwe cyane n’imvugo y’abantu bamwe na bamwe mugirango munzize gusa ko nifuza ko Abarundi bongera gushyira hamwe kandi ngashaka ko amahoro yagaruka vuba muri iki gihugu cyacu. Nari nzi ko abahora bavugira abarundi baba koko banabitayeho none nasanze batanifuza ko naza kubavugiriza umuziki ngo ni icyaha gikomeye. Mbese kuki imikino y’umupira w’amaguru ibera muri Stade Prince Louis Rwagasore igahuza u Burundi n’ibindi bihugu, ko mutayirwanya ariko mukaba murwanya uyu muziki wahuje abarundi kuwa Gatandatu bikozwe na ambasade ya Kenya i Bujumbura? "

Mu bo Kidum yagaragaje ko bababajwe n’uko yataramiye abarundi, harimo uwitwa Bob Rugurika, uyu akaba ari umwe mu batavuga rumwe n’ubutegetsi bwa Nkurunziza ndetse akaba aba mu buhingiro. Uyu kandi yanahoze ayobora Radio yigenga yo muri iki gihugu yitwa RPA. Bob Rugurika, yari yanyujije kuri twitter ubutumwa bugaragaza ko Kidum yabaye igikoresho cya Leta ya Nkurunziza.

Kidum ati: "Bob Rugurika, kubera iki udashaka kurenganya Uhuru Kenyatta ariko ukaba undenganya njyewe umurundi? Kubera iki utigeze undenganya igihe natumirwaga na RPA muri 2001 nje kuririmba amahoro nk’uku kandi mu ishyamba hari hakiri imitwe yitwaje intwaro harimo na CNDD FDD ya Pierre Nkurunziza, FDD ya Jean Bosco Ndayikengurikiye, FNL ya Rwasa Agathon, FNL ya Bitaryumunyu, CNDD ya Nyangoma Frolina n’iyindi igihe Pierre Buyoya yari akiri umukuru w’igihugu? Wiyibagije ko icyo gihe abantu bari barimo bicwa?... Si umwanya wo guterana amagambo na we ariko njyewe icyo nzi ni uko mufite umuhuza Benjamin Mkapa muri uko guhangana mu bya politiki mufitanye Hagati yanyu nabo kwa Nkurunziza Pierre, reka kubabazwa n’uko njyewe nihuriza Abarundi hamwe mu mugambi wo kubanezeza no kubashyira hamwe! Nta mutwe wa politiki n’umwe mbamo nta n’uwo nkeneye nta n’ibyo nshoboye, aha ngusubije mfite akababaro kenshi."

Mu kugaragaza akababaro aterwa n’intambara zo mu Burundi, Kidum yaboneho kuvuga ko izi ntambara zatumye atabasha kurangiza amashuri ye kubera amatiku yabaye kuva mu 1993, ndetse aboneraho guhishura ko afite barumuna be babiri bafungiwe muri gereza ya Mpimba nyuma yo gufatwa bari mu myigaragambyo yamaganaga manda ya gatatu ya Perezida Nkurunziza.

KANDA HANO UREBE VIDEOS UTASANGA AHANDI