Kitoko Bibarwa yashyize agaragaza umwana we ariko agira ubwiru uwo babyaranye

Chief Editor | 28-06-2016
Kitoko Bibarwa yashyize agaragaza umwana we ariko agira ubwiru uwo babyaranye

Nyuma y’igihe yaragize ibanga amakuru y’umwana w’umukobwa yabyaye, Kitoko yamwerekanye anagaragaza ko atewe ishema n’uko yitwara mu masomo ye, gusa yirinda kwerura iby’uwo bamubyaranye.

Hashize igihe kiri hagati y’imyaka ine n’itanu umuhanzi Kitoko Bibarwa Patrick yibarutse umwana w’umukobwa, ndetse yahise anamwita rimwe mu mazina ye, kuko yitwa Bibarwa Shiloh. Ntabwo yakunze kubigaragaza, ndetse n’uwo bamubyaranye yakunze kumugira ibanga rikomeye.

Uyu niwe mukobwa w’umuhanzi nyarwanda Kitoko Bibarwa Patrick

Mu mpera z’icyumweru dusoje, nibwo Kitoko yashyize hanze ifoto ya Bibarwa Shiloh abinyujije kuri Instagram, akaba yaragaragazaga ko yarangije amashuri y’incuke afite amanota meza. Kitoko ati: "Iyi ni intangiriro y’ibyo ushaka kugeraho mu buzima bwawe Bibarwa Shiloh. Natwe (ababyeyi bawe) dutewe ishema n’ibyo ugenda ugeraho kandi nizeye ko uzakora ibirenzeho."

Ikinyamakuru Ukwezi.com cyaganiriye na Kitoko tumubaza iby’uyu mwana we, aho yiga n’amakuru y’uwo bamubyaranye, ntiyashaka kubyerura ndetse avuga ko uwo bamubyaranye atifuza ko byatangazwa, kuva ubwo ahita anasiba ifoto y’umwana we yari yashyize ku rubuga rwa Instagram.

Gusa amakuru agera ku kinyamakuru Ukwezi.com, avuga ko uyu mwana Kitoko yamubyaranye n’umukobwa wagaragaye mu mashusho y’indirimbo ye yakunzwe cyane mu myaka yashize yitwa "Ikiragi".

KANDA HANO UREBE VIDEOS UTASANGA AHANDI