Knowless na Clement ntibagisezeranye imbere y’Imana mu itorero ry’Abadivantisiti

Chief Editor | 2-08-2016
Knowless na Clement ntibagisezeranye imbere y’Imana mu itorero ry’Abadivantisiti

Nyuma ya byinshi byavuzwe ku bukwe bwa Knowless na Clement n’itorero basengeramo ry’Abadivantisiti b’umunsi wa Karindwi, ubu amakuru y’impamo ni uko batazigera basezerana imbere y’Imana nk’uko bari barabiteguye mbere.

Nyuma yo gusezerana imbere y’amategeko ndetse hakaba n’imihango yo gusaba no gukwa, ubukwe bwa Butera Knowless na Ishimwe Clement byari biteganyijwe ko buzakomezanya n’imihango yo gusezerana imbere y’Imana yari iteganyijwe ku Cyumweru tariki 7 Kanama 2016, ariko ibyo gusezerana byo byamaze kwanga.

Pasiteri Ezra Mpyisi, yatangarije ikinyamakuru Ukwezi.com ko Karake Naphtal, Se wa Clement ari we mu minsi ishize wamusabye ko yazasezeranya umuhungu we, ahita abyemera atazuyaje kuko yari asanzwe azi uyu Karake nk’umwizera akaba n’umwe mu bayobozi b’Itorero ry’Abadivantisiti b’umunsi wa Karindwi ry’i Nyamirambo, akumva ko n’umwana we ari uko. Yamubwiraga ko ubukwe bw’umwana we buzabera i Nyamata muri Golden Tulip Hotel ari naho bari kuzasezeranira bakaba ari naho biyakirira.

Nyuma Mpyisi yagize amakenga, atuma Karake Naphtal icyemezo cy’itorero kugirango abone kubasezeranya, nyuma Karake aza kumuhamagara amubwira ko azajya kumureba akamubwira uko bimeze ariko kugeza n’ubu Pasiteri Ezra Mpyisi yarategereje araheba.

Byavugwaga ko Itorero ry’Abadivantisiti b’umunsi wa karindwi ry’i Nyamirambo ryaba ryaranze gusezeranya Knowless na Clement kuko umukobwa atwite kandi akaba yaritabiriye amarushanwa yamamaza inzoga, nyamara ibi si ukuri a gato ahubwo Knowless na Clement ntabwo banabarwa nk’abizera b’iri torero.

Ikinyamakuru Ukwezi.com cyanyarukiye i Nyamirambo, kigirana ikiganiro kirambuye na Pasiteri Mwangazi Celse uyobora Itorero ry’Abadivantisiti b’umunsi wa Karindwi ry’i Nyamirambo. Pasiteri Mwangazi, avuga ko iby’uko iri torero ryanze gusezeranya Knowless na Clement nawe abyumva atyo, kandi ngo ntanabazi uretse kubabona mu bitangazamakuru.

Avuga ko aba bombi ntawanditswe nk’umwizera w’itorero ryabo, kandi nyuma yo kumva ibivugwa akaba yarabajije abandi bapasiteri agasanga nta torero ry’Abadivantisiti na rimwe banditsemo. Ashimangira ko ababyeyi ba Clement bo ari abizera b’intangarugero mu itorero ayobora, ndetse ni n’abayobozi kuko Karake Naphtal akuriye icyiciro cy’ubutabazi, naho umufasha we akaba akuriye icy’abasheshe akanguhe.

Ibyo kuba Pasiteri Mpyisi yarasabwe kubasezeranya, Mwangazi avuga ko nabyo ubusanzwe atari ko bikorwa, ahubwo abashaka gushyingirwa ubwabo babisaba itorero noneho ryo rigahitamo uwo riha izo nshingano, kandi bikanamenyekana mu itorero bakanabaranga imbere y’imbaga y’abizera mu gihe kirekire mbere y’ubukwe.

Ibyo gusezeranira muri hoteli nabyo, avuga ko ubusanzwe ntaho biba, ko uyu ari umuhango wera uba ugomba kubera mu nzu y’Imana. Agira ati: "Wowe uko ungana uko hari aho wari wabyumva cyangwa hari aho wari wabibona ko abantu basezeranira muri hoteli?"

Pasiteri Celse avuga ko Karake Naphtal yamubwiye ko afite umwana uzakora ubukwe ariko akaba ntaho azi aba bageni bazasezeranira, n’ubwo akomeza kumva bivugwa ko ari mu itorero ayobora kandi batanahanditswe.

KANDA HANO UREBE VIDEOS UTASANGA AHANDI