Knowless umaze igihe ahisemo uzamushyingira, yaba aca amarenga y’ubukwe bwe na Clement?

Chief Editor | 13-05-2016
Knowless umaze igihe ahisemo uzamushyingira, yaba aca amarenga y’ubukwe bwe na Clement?

Umuhanzikazi Butera Knowless n’umukunzi we Ishimwe Clement, baraca amarenga y’ubukwe bwabo nyuma y’igihe uyu muhanzikazi atangaje uwo yamaze guhitamo ngo azamubere umushyingira, ku rundi ruhande abakunzi babo babagaragarije ko bategerezanyije amatsiko ubukwe bwabo.

Butera Knowless na Ishimwe Clement, bamaze igihe kirekire bakundana n’ubwo badakunda kwemera mu itangazamakuru iby’urukundo rwabo, ahubwo bakabivuga nk’abaca amarenga. Mu minsi ishize ubwo Clement yabazwaga iby’urukundo rwe na Knowless, yashimangiye ko uyu muhanzikazi ari mwiza cyane kandi ko gukundana nawe byamushimisha cyane, mu magambo ye akaba yaragize ati: “Knowless ni umukobwa uteye neza mu buryo bwose bushoboka, bibayeho tugakundana byanshimisha cyane, dore ko ntacyo abaye"

Nyuma Knowless nawe yatangaje ko Clement ari umusore ufite byinshi byiza ndetse ko atabasha kurondora ibyiza amubonaho, kandi bombi bakaba ari ingaragu bityo mu gihe Imana yabyemera bakaba bakundana bakazanabana, kandi nawe akaba yabyishimira. Iki gihe kandi, Knowless yanahamije ko bigeze kubiganiraho ariko bakaba batarabitinzeho ngo babifatire umwanzuro.

Mu minsi ishize kandi, nibwo Knowless yashyize hanze amafoto y’umugore w’inshuti ye avuga ko yubaha cyane, ari nawe yemeje ko yamaze guhitamo ngo azamubere umushyingira (marraine). Ibi byatumye benshi batekereza ko uyu mukobwa yaba aca amarenga ko ubukwe bwe buri hafi, kandi nta wundi musore uhita utekerezwa utari Clement.

Aha Knowless yavugaga ko uyu ari we uzamushyingira (marraine)

Kuri uyu wa Kane tariki 12 Gicurasi 2016, Knowless na Clement bashyize ku mbuga za Instagram ifoto bari kumwe bavuga iby’igitaramo cya Knowless azakorera mu Ruhango, nyamara ntabwo abantu benshi bumvise impamvu hakoreshejwe iyi foto bari kumwe mu gihe havugwaga iby’igitaramo. Buri wese watanze igitekerezo kuri iyi foto, yagarukaga ku kuba barimo guca amarenga ko ubukwe bwabo buri vuba.

Iyi niyo foto Knowless na Clement bashyiriyeho icyarimwe, bakirizwa ibibazo ku matariki y’ubukwe bwabo

Mu kiganiro na Knowless udakunda kwemera byeruye iby’urukundo rwe na Clement ndetse n’iby’ubukwe bwabo, yabwiye Ukwezi.com ko yashimishijwe no kubona abafana be bamwifuriza kuba yakorana ubukwe na Clement, avuga ko bigaragaza urukundo bamukunda kuko bamwifuriza ibyiza. Gusa uyu mukobwa yanze kwerura ibya gahunda y’ubukwe bwabo.

KANDA HANO UREBE VIDEOS UTASANGA AHANDI