Knowless yasabwe anakobwa na Clement mu muhezo, hanze ho inkoni yarishaga - Amafoto

Chief Editor | 31-07-2016
Knowless yasabwe anakobwa na Clement mu muhezo, hanze ho inkoni yarishaga - Amafoto

Ku mugoroba wo kuri iki Cyumweru tariki 31 Nyakanga 2016, nibwo Butera Knowless yasabwe anakobwa na Ishimwe Clement, nyuma yo gusezerana imbere y’amategeko. Ni ubukwe bwabaye mu muhezo, ndetse hari n’abakubiswe bagerageza kwihera ijisho.

Ibi birori byabereye ku i Rebero aho bakunda kwita ku babikira, mu birometero nk’icumi witaruye umujyi wa Kigali rwagati. Kwinjira byasabaga kwerekana urupapuro rw’ubutumire, ndetse hari hari n’urutonde rwanditseho abatumiwe kuburyo nta n’uwari kurutira, bishimangira ko nta muvumba n’umwe wari wemerewe kuhakandagira.

Abatumiwe bagombaga gutora umurongo, bakerekana ubutumire bakavuga n’amazina yabo bakareba ko bari ku rutonde

TMC na Platini baririmba muri Dream Boys, aha bari bageze ahabereye ubukwe

Abahanzi nka Patrick Nyamitari na Tom Close bari ku marembo y’ahabereye ubukwe, bari kumwe n’abasore b’ibigango (Bouncers) bari bahawe akazi ko kubuza abashaka kwinjira muri ibi birori badafite ubutumire cyangwa batari ku rutonde rw’abatumiwe.

Kubera izuba, bamwe bitwikiraga imitaka bari ku murongo

Uyu musore w’ibigango (bouncer) ntawari kumwinjirana atari ku rutonde. Aha yavuganaga ku cyombo na mugenzi we bavugana uko umutekano wifashe

Hanze hari abantu bari bahuruye bashaka kwirebera ubu bukwe bw’ibyamamare, ariko ntabwo byabakundiye. Ku rundi ruhande hari abagerageje kurira ibiti byari hafi aho ngo babashe kurebamo imbere, ariko nabo ntibyaboroheye, ndetse umwe muri bo yatewe imijugujugu amanurwa nabi akubitwa, n’ubwo nyuma abandi baje kubareka bakarebera mu biti. Hanze kandi hari abandi bana bashakaga kurira ku ngufu, aba nabo bakaba bagiye bakubitwa babuzwa guca ahatemewe.

Ukigera ku marembo, wagombaga kubanza ukareba ko wibutse urupapuro rw’ubutumire rwawe

Mu batumiwe nabo, hari babiri Ikinyamakuru Ukwezi.com cyabashije kubona, bahageze barambirwa gutonda umurongo wasabirwagaho ibyangombwa (urupapuro rw’ubutumire) bahitamo kwitahira batirebeye ibi birori, umwe agenda avuga ko nta bukwe bw’aba ’Stars’ yakongera gutaha.

Uyu mwana wari wuriye igiti, hari abandi bari bahawe akazi ko gufatanya n’aba ’Bouncers’ gucunga umutekano bamumanuye nabi n’imijugujugu

Impande zose abantu bari bashungereye babujijwe kwinjira

Aburiye ibiti baje gukomorerwa bemererwa kurebera ubukwe mu bushorishori

Kugirango ugere ahabereye ubu bukwe, bigusaba kubanza ukagenda urugendo runini mu muhanda w’igitaka. Aha Christopher na Dj Zizou bari bagiye mu bukwe, bageze mu ishyamba rinini ucamo uganayo.

KANDA HANO UREBE VIDEOS UTASANGA AHANDI