Koffi Olomide ari mu mazi abira nyuma yo guhohotera umukobwa umubyinira - Video

Chief Editor | 22-07-2016
Koffi Olomide ari mu mazi abira nyuma yo guhohotera umukobwa umubyinira - Video

Umuririmbyi w’icyamamare mu njyana ya Rumba ukomoka muri Repubulika Iharanira Demokarasi ya Kongo, wamamaye ku mazina ya Koffi Olomide, ari mu mazi abira mu mujyo wa Nairobi muri Kenya azira guhohotera umwe mu babyinnyi be

Mu gitondo cyo kuri uyu wa Gatanu tariki 22 Nyakanga 2016, nibwo Koffi Olomide yageze muri Kenya aho afite igitaramo gikomeye kuri uyu wa Gatandatu, akaba yari kumwe n’itsinda ry’abantu 6 bagombaga kuzamufasha. Ageze ku kibuga cy’indeye mpuzamahanga cya Jomo Kenyatta, yakiriwe n’imbaga y’abakunzi be.

Aha ariko yaje kuhakorera igikorwa gikomeje kugawa cyane n’abaturage b’iki gihugu, icyo kikaba ari urugomo yakoreye umwe mu babyinnyi be akamukubita imigeri cyane, aho bivugwa ko yamuzizaga kutumvikana n’umwe mu bagize itsinda rimufasha kuririmba yagize inshoreke ye witwa Cindy. N’ubwo Koffi Olomide afite umugore n’abana 7 babyaranye, uwo Cindy ni ihabara rye kuva muri 2012, ndetse mu itsinda ry’ababyinnyi n’abaririmbyi akaba adakorwaho. Ubwo uyu muhanzi yakubitaga umubyinnyi we, Polisi yahise ihagera ibasha kubihosha.

REBA HANO UKUNTU KOFFI OLOMIDE YAKUBISE UMUBYINNYI WE:

Nyuma y’iki gikorwa kigaragaza ihohoterwa ryakorewe uyu mukobwa ubyinira Koffi Olomide, abantu batandukanye barimo n’abazwi cyane muri Kenya bakomeje gusaba ko uyu mugabo yahita yirukanwa igitaraganya muri iki gihugu n’igitaramo cye kigasubikwa, hakaba n’abamusabira guhita afatwa agafungwa.

Ian Mbugua ni umwe mu bagabo bazwi kandi bakunzwe cyane muri Kenya, n’abanyarwanda batari bacye bakaba bamuzi nk’umukemurampaka ukomeye mu marushanwa ya Tusker Project Fame. Uyu ari mu batangije urugamba rwo gusaba ko Koffi Olomide yahita yirukanwa igitaraganya muri Kenya ndetse nyuma akanakurikiranwa.

KANDA HANO UREBE VIDEOS UTASANGA AHANDI