Ku myaka 87, Terezina arimo guhatanira ikamba ry’ubwiza rya Miss Bumbum - Amafoto

Chief Editor | 25-05-2016
Ku myaka 87, Terezina arimo guhatanira ikamba ry’ubwiza rya Miss Bumbum - Amafoto

Terezina Isen w’imyaka 87 y’amavuko, ni umukecuru ufite abana batatu, abuzukuru icyenda n’abuzukuruza batanu, nyamara n’ubwo akuze afite icyizere cyo kwegukana ikamba rya Miss Granny Bumbum mu gihugu cya Brazil, abikesha imiterere y’inyuma ye (ikibuno) abona ntawabasha kumuhiga.

Mu gihugu cya Brazil, buri mwaka hasanzwe haba amarushanwa y’ubwiza ariko bwibanda cyane ku miterere y’inyuma, aho umukobwa utsinda aba ari ufite ikibuno giteye neza kurusha abandi. Muri uyu mwaka wa 2016 ariko wo habayemo agashya, kuko hongewemo ibyiciro hagahabwa amahirwe n’abagore bakuze ngo nabo bahatane.

JPEG - 118.2 kb

Ku myaka ye 87, arashaka kwambikwa ikamba rya Miss Bumbum

Mu marushanwa y’uyu mwaka wa 2016, abagore bakuze benshi biyemeje guhatana, ukuze kurusha abandi akaba ari Terezina Isen w’imyaka 87 n’ubwo hari abandi bamugwa mu ntege mu myaka. Uyu mukecuru w’umupfakazi, amaze iminsi akora ibishoboka byose ngo agaragare neza kuburyo azabasha guhigika bagenzi be.

Aganira na Daily Mail yagize ati: "Nenda kuzuza imyaka 90 ariko niyumva nk’urubyiruko, kandi si uko niyumva gusa imbere, n’inyuma mbona nkigaragara nk’inkumi. Simeze nka ba bakecuru usanga bafite iminkanyari myinshi ku ruhu kandi inda yanjye nayo iracyameze neza, buri gice cy’umubiri kiri mu mwanya wacyo. Kuva na cyera nkiri muto cyane, nari umukobwa w’igitangaza mu mujyi wacu, nari umukobwa buri wese yarangariraga. Ubu rero, ni igihe cyo kwerekana ko ari ko bikimeze".

JPEG - 79.3 kb

Aha yari kwa muganga bamukorera ubuvuzi bw’imitsi ngo iminkanyari ye itagaragara cyane

Terezina wo mu mujyi wa Salvador muri Brazil, yashatse umugabo afite imyaka 21 y’amavuko ariko aza gupfusha umugabo we bamaranye imyaka 42 babana, ariko avuga ko kuba wenyine byatumye yongera kugaragara nk’ukiri muto. Agira ati: "Umugabo wanjye ntabwo yajyaga ampa ubwisanzure ngo nsohoke nidagadure, ubuzima bwanjye turi kumwe bwari ubwo gukora imirimo yo mu rugo no kwita ku bana. Nahoraga kuva cyera mfite inzozi zo kuzaba Miss, maze kumva ko muri aya marushanwa barimo kwemera n’abagore bakuze, nahise niyemeza nanjye guhatanira ikamba rya Miss Bumbum".

Undi ukuze uri muri aya marushanwa, ni uwitwa Eliza Gattermayer w’imyaka 63 y’amavuko. Uyu we avuga ko umubiri we uteye neza cyane kandi akaba atarigeze yibagisha cyangwa ngo akore ibindi byatuma akomeza kwihindura inkumi, ubwiza karemano n’ikimero gituma agaragara nk’ukiri muto akaba yizeye ko bizamufasha gutsinda akambikwa ikamba rya Miss Bumbum.

JPEG - 79.8 kb

Uyu Eliza w’imyaka 63 we ngo yumva nta kabuza azegukana ikamba

Eliza avuga ko nyuma yo gushakana n’umugabo we bakabana nabi, yumvise abohotse ubwo batandukanaga mu myaka 5 ishize, nyuma yo kubana imyaka isaga 30 mu ntonganya. Avuga ko agaragara nk’umugore w’igitangaza n’ubwo akuze kandi akaba yifuza gutwara umutima abagabo benshi binyuze muri aya marushanwa.

Agira ati: "Nkimara gutandukana n’umugabo nahise numva mbohotse nkora ibintu byose nari mfite inzozi zo gukora, inzozi zanjye zari izo kuba Miss kandi mu myaka yashize nagiye nitabira amarushanwa atandukanye mbasha no gutsinda amwe muri yo. No muri Miss Bumbum, ndashaka kwereka abagore tungana ko ubuzima bugomba gukomeza, utagomba kwicara mu rugo ngo urebe televiziyo cyangwa ukore ibindi wihebye utegereje gupfa. Nibandeba bajye babona ko no mu myaka y’ubukure ushobora kuba mwiza kandi ugakurura abagabo benshi. Nindamuka negukanye ikamba rya Miss Bumbum, nzi neza ko abagabo benshi nzabatwara umutima. N’iyo ntatsinda kandi, ntibizambuza gukora ibishoboka byose ngo ntume abagabo benshi bampanga amaso"

JPEG - 228 kb
JPEG - 99.8 kb
JPEG - 210.4 kb

Eliza yifuza ko amarushanwa ya Miss Bumbum yazasiga abagabo bamuhanze amaso ku bwinshi

Amarushanwa ya Miss Bumbum azasozwa mu kwezi k’Ugushyingo uyu mwaka, mbere y’isozwa ry’amarushanwa abahatana bakaba bazakora ibikorwa bitandukanye by’imyiyerekano birimo ibyo bazakorera ku mazi bambaye utwenda two kogana n’ibindi bizatuma bagaragaza imiterere y’ubwiza bwabo.

KANDA HANO UREBE VIDEOS UTASANGA AHANDI