Kwigamba ubusambanyi byahagaritse ikiganiro cya Miss Vanessa na Miss Sandra kuri Televiziyo

Chief Editor | 12-08-2016
Kwigamba ubusambanyi byahagaritse ikiganiro cya Miss Vanessa na Miss Sandra kuri Televiziyo

Abakobwa b’inshuti magara, Miss Sandra Teta na Miss Uwase Vanessa Raissa bamaze iminsi batandukanye n’abasore bo mu itsinda rya Active bakundanaga, bamaze igihe batagaragara kuri TV10 aho bakoraga ikiganiro, intandaro ya byose bikaba bivugwa ko ari icyasha cy’inkuru bavuzweho zirimo kuba Miss Vanessa yarigambye mu ruhame ko yasambanye na Olvis wo muri Active.

Guhera ku Cyumweru tariki 27 Werurwe 2016, hatangiye ikiganiro cyitwa "Rwandaful" cyari kimaze amezi atatu gikorwa na Miss Sandra Teta ndetse na Miss Uwase Vanessa Raissa. Ni ikiganiro cyacaga kuri TV 10 buri cyumweru guhera ku isaha ya saa mbiri z’ijoro, kigatambuka mu rurimi rw’icyongereza, kivuga ku byiza by’u Rwanda. Gusa ubu ukwezi kurihiritse ikiganiro kidatambuka.

JPEG - 263.3 kb

Miss Vanessa na Miss Sandra Teta, bafatanya ibikorwa byinshi

Amakuru yizewe agera ku kinyamakuru Ukwezi.com, ashimangira ko ubuyobozi bwa TV 10, tariki 30 Kamena 2016 bwicaye bukaganira kuri aba bakobwa, bugasanga barambaye icyasha gishobora gutesha agaciro iyi televiziyo mu gihe bakomeza gutambutsa iki kiganiro, bakanzura ko babahagarika n’ikiganiro kigahagarara.

Mu kiganiro ikinyamakuru Ukwezi.com cyari cyagiranye na David Bayingana tariki 1 Nyakanga 2016, nk’umwe mu bayobozi ba TV 10, yatwemereye ko ari byo koko aba bakobwa bizweho n’ubuyobozi bugasanga ikiganiro cyabo gikwiye gihagarara bitewe n’imyitwarire bavuzweho ishobora guhesha isura mbi televiziyo. David Bayingana yavugaga ko nyuma yo kuganira nk’abayobozi ba TV 10, bagomba no kwicarana n’aba bakobwa bakaganira bakanamenyeshwa uko ibintu byifashe.

JPEG - 172.3 kb

David Bayingana, umuyobozi wungirije wa TV 10

Nyuma yo kumenya ko iki kiganiro kimaze ukwezi kidatambuka, ikinyamakuru Ukwezi.com cyaganiriye na Jado Castar; umuyobozi mukuru wa TV10, atwemerera ko iki kiganiro koko kitagitambuka, ariko avuga ko bandikiye ba nyiri ikiganiro babasaba ko bazaza bakaganira, gusa bakaba batarigeze bitaba cyangwa ngo bagire ikindi basubiza.

Jado Castar kandi avuga ko ubuyobozi bukuru rwa Radio 10 na TV10 busanzwe bugira amabwiriza ngengamyitwarire abakozi baba bagomba kugenderaho, nawe akaba yarabandikiye nyuma yo kubisabwa n’ubuyobozi bumukuriye n’ubwo batigeze bamwitaba, ahubwo kuva ubwo ikiganiro nticyongere gutambuka. Uyu muyobozi ariko ntiyerura ngo avuge ko iki cyemezo kigendanye no kuba umwe muri aba bakobwa yarigambye ubusambanyi yakoranye na Olvis wo mu itsinda rya Active.

PNG - 460.8 kb

Bagirishya Jean de Dieu ( Jado Castar), umuyobozi wa TV10

Mu minsi ishize, Miss Vanessa yemeye mu itangazamakuru ko yaryamanye na Olvis wo mu itsinda rya Active bahoze bakundana, ariko anashimangira ko yumva ataciye inka amabere kuba yararyamanye n’umusore bakundanaga.

JPEG - 198.4 kb

Aha ni mu ifatwa ry’amashusho y’ikiganiro cyamaze amezi atatu gikorwana Miss Vanessa na Miss Sandra Teta ubu kikaba cyarahagaze

Yagize ati: "Kuri njyewe numva ko umuntu wese byamubaho. Ntabwo ari ukuvuga ngo ni njye mukobwa wenyine mu Rwanda wambariye ukuri umuntu akunda... Ibyo ari byo byose si njye njyenyine wabikoze mu Rwanda cyane ko si umuhungu uhise wese, yari umusore w’inshuti yanjye dukundana... Ubigaya wese ni uko wenda ashobora kuba ari isugi cyangwa se ategereje kuzakora ubukwe kugirango nawe yambarire ukuri uwo akunda. Gusa simvuze ko ibyo ngibyo ari ibintu byiza cyangwa se abantu bagakoze, gusa nanone ntabwo ntekereza ko naba naraciye inka amabere kuburyo abantu babigaya ngo bancireho iteka.”

Ikinyamakuru Ukwezi.com cyagerageje kuvugana n’aba bakobwa ku murongo wa telefone, gusa ntibyadukundiye kuko iya Miss Sandra Teta itari iri ku murongo naho iya Miss Vanessa yo ntabwo ayitaba.

KANDA HANO UREBE VIDEOS UTASANGA AHANDI