Menya udushya twinshi Aline Gahongayire yakoze turimo gukopera agakopera n’izina

Chief Editor | 24-09-2016
Menya udushya twinshi Aline Gahongayire yakoze turimo gukopera agakopera n’izina

Buri muntu mu bwana bwe, akora utuntu twinshi turimo udusekeje ndetse n’udutangaje, kuburyo ushobora gusanga buri wese hari akantu yakoze kakamusetsa kuburyo kugeza n’ubu iyo akibutse yumva nawe yisetse. Ibyamamare nabyo biba byaranyuze mu tuntu nk’utwo, n’ubwo benshi baba barabamenye bakuze. Ibya Aline Gahongayire byo, iyo ubyumvise ushobora guseka ugatembagara.

JPEG - 38.7 kb

Mu bwana bwe, Aline Gahongayire yivugira utuntu yagiye akora n’utwagiye tumubaho dusekeje mu bwana bwe, ibi akaba yarigeze no kubigarukaho mu minsi yashize mu kiganiro na 10 Tonight. Muri iyi nkuru, turabagezaho udushya dutandukanye uyu muhanzikazi yagiye akora.

- Aline Gahongayire, akiri umwana yakundaga cyane nyirarume, yumvaga ari we uzamubera umugabo

Mu gihe yari umwana w’umukobwa muto cyane yiga mu mashuri y’incuke, Aline Gahongayire yibuka ko yakunze cyane umusore wari umubereye nyirarume, kuburyo yumvaga namara gukura nta wundi uzamubera umugabo utari uwo. Gusa ibi byari iby’ubwana, iyo abyibutse ubu ariseka.

- Aline Gahongayire yakundanye icyarimwe n’abasore babiri biganaga, uko yabyitwayemo n’ubu iyo abyibutse aratembagara.

Ubwo yigaga mu mashuri abanza, Aline Gahongayire yakundanye n’abasore babiri, umwe akamukundira ko yari umukinnyi w’umupira w’umuhanga, ariko akanga kwitesha undi nawe wamukundaga kandi ari umuhanga cyane mu ishuri. Mwarimu yaje kubafata arabicaranya, Gahongayire akajya abicara hagati, maze biramukomerera cyane.

Umwe muri bo yaje kumwandikira amubwira ko amukunda anashyira mu ibahasha amafaranga 500, Gahongayire yumva uwo musore yamusuzuguye maze undi mukobwa mugenzi we amugira inama ko ibaruwa n’amafaranga yabicagagura akabyoherereza wa musore, ibyo yarabikoze ariko n’ubu aho ahuriye n’uwo musore (ubu wakuze akaba umugabo) bombi baraseka bagatembagara.

- Imibyinire ya Gahongayire yatumye bamwita Aline Ndombolo, kandi yari indwanyi ikomeye.

Mu buto bwe, Aline Gahongayire yari umukobwa ushabutse kandi wakundaga kubyina indirimbo zigezweho, kuburyo byatumye bamubatiza Aline Ndombolo. Ibi abantu biganye nawe bose, avuga ko ari ibintu badashobora kwibagirwa.

Icyo gihe kandi, Aline Gahongayire yakundaga kurwana, kuburyo atari we warotaga amasaha yo kujya hanze ageze, agasohoka mu ishuri ajya kureba abo barwana, yari indwanyi ikomeye na bagenzi be biganaga babimuziho.

- Aline Gahongayire yigeze gukopera mugenzi we, akoporora byose adasize n’izina ry’uwo yakoperaga.

Ubwo yigaga mu mashuri yisumbuye, Aline Gahongayire yangaga cyane isomo ry’ubugenge (Physics) kandi ryaramutsindaga cyane. Rimwe yaje kwicarana na mugenzi we wari umuhanga witwa Mariam, amusaba ko amukopeza undi aramwemerera, maze Gahongayire akoporora ibya Mariam byose aribagirwa n’amazina yandikaho ay’uwo mugenzi we. Ibyo byatumye mwarimu amuvumbura, amuzengurutsa amashuri yose agenda avuga ibyo yakoze. Ibi ni ibintu uyu muhanzikazi adashobora kwibagirwa.

- Aline Gahongayire yacitse amasomo ajya kuryama, bamufashe yihisha mu ivarisi akoreramo agashya

Ubwo yigaga mu mashuri yisumbuye, Aline Gahongayire na bagenzi be bigeze gucika amasomo (gukarota) bajya kuryama, umuyobozi w’ikigo yinjiye aho bararaga Gahongayire yihisha mu ivarisi ariko igice cyo hejuru kiranga kiragaragara, niko kubura uko agira apepera umuyobozi w’ikigo, umuyobozi nawe abuze uko agira aramupepera, arumirwa bituma n’abandi bari bihishe babyungukiramo.

IYUMVIRE UDUSHYA TWOSE GAHONGAYIRE YAKOZE HANO:

KANDA HANO UREBE VIDEOS UTASANGA AHANDI