Miss Mutesi Jolly yitabaje CID kubera umusore wariye rubanda amafaranga mu izina rye

Chief Editor | 17-08-2016
Miss Mutesi Jolly yitabaje CID kubera umusore wariye rubanda amafaranga mu izina rye

Miss Rwanda 2016, Mutesi Jolly, amaze igihe yitabaje urwego rushinzwe iperereza n’ubugenzacyaha muri Polisi y’u Rwanda ruzwi nka CID ndetse arimo no gutegura ikirego ngo akurikirane umusore wagiye arya rubanda amafaranga yabo mu izina rye yifashishije imbuga nkoranyambaga.

Miss Mutesi Jolly yatangarije ikinyamakuru Ukwezi.com ko hari umusore wifashishije urubuga rwa Facebook agafungura ipaji (Facebook page) iri mu mazina ye, akajya yandikirana n’abantu ababeshya ko yafunguye kompanyi ikora ibijyanye n’imideri, akabasaba kwishyura amafaranga ngo biyandikishe.

JPEG - 295.2 kb

Miss Jolly ati: "Yagendaga abaka amafaranga atandukanye, hari abo yatse ibihumbi 10, hari abo yagiye yaka ibihumbi 20 cyangwa ibihumbi 30, akabikora avuga ko nafunguye agency y’imideli, bakaba basabwa kwishyura ayo mafaranga ngo biyandikishe."

JPEG - 118.4 kb

Miss Mutesi Jolly yabwiye ikinyamakuru Ukwezi.com ko kugirango bamenye ko ari umusore, hari umuntu umwe mu bariwe amafaranga wamuhamagaye akabimumenyesha ndetse akamuha na nimero ya telefone akoresha, amubwira ko bavuganye akamubeshya ko ari umujyanama (manager) wa Miss Rwanda 2016.

Uyu Nyampinga w’u Rwanda asobanura ko bakibimenya yafatanyije n’umujyanama we, Kagame Ishimwe Dieudonne bakunda kwita Prince Kid bakabimenyesha ishami rya Polisi y’u Rwanda rishinzwe gukora iperereza n’ubugenzacyaha (CID) rigatangira kubikurikirana, hanyuma nawe akaba arimo gutegura ikirego kugirango azagitange vuba aha.

JPEG - 54.8 kb

Mu minsi ishize, Miss Rwanda 2015; Kundwa Doriane nawe yitabaje Polisi y’u Rwanda avuga ko hari uwamwiyitiriye ku mbuga nkoranyambaga agakundana n’umusore uba hanze y’u Rwanda akajya amwaka amafaranga nyuma akaburirwa irengero.

KANDA HANO UREBE VIDEOS UTASANGA AHANDI