Rutamu na Rugimbana Théogène bamaze kuva kuri Radio bakoreraga, bagiye guhuza imbaraga

Chief Editor | 22-05-2016
Rutamu na Rugimbana Théogène bamaze kuva kuri Radio bakoreraga, bagiye guhuza imbaraga

Abanyamakuru Rugimbana Théogène na Rutamu Elie Joe bakunzwe na benshi mu Rwanda kubera ubuhanga n’impano bafite mu kogeza imikino y’umupira w’amaguru, hari amakuru yizewe agera ku kinyamakuru Ukwezi.com ashimangira ko bagiye kuva ku maradiyo bakoreraga bakajya guhuriza imbaraga ahandi.

Rutamu Elie Joe na Rugimbana Théogène, bombi bamamariye kuri Radio Flash FM, ariko baza kuhava bajya gukorera izindi Radio. Rutamu yabanje kujya ku Isango Star nyuma aza kujya kuri Radio Rwanda ari naho yari ari kugeza ubu, mu gihe Rugimbana we yakoreraga Radio 10, ariko bombi n’ubwo bataratangira gukorera ibitangazamakuru byabo bishya, bamaze gusezera ndetse mu minsi micye bakaba bitegura kubishyira ahagaragara.

Kakoza Nkuriza Charles uzwi nka KNC, niwe wamaze kugirana amasezerano mashya n’aba banyamakuru b’imikino, bakaba bagomba gutangira akazi kabo kuri Radio 1 na TV1 mu minsi micye, ariko ahanini bakaba bifuzwa ngo bazogeze imikino y’igikombe cy’u Burayi kizabera mu Bufaransa guhera muri Kamena uyu mwaka.

Biteganyijwe ko iyi mikino y’amakipe y’ibihangange i Burayi, izatangira tariki 10 Kamena 2016, ikazarangira tariki 10 Nyakanga 2016, KNC akaba yarifuje ko aba banyamakuru bazamufasha kogeza iyi mikino bityo nawe akarushaho kwiyongerera abakunzi no kuzamura ikigero cy’amatangazo yo kwamamaza yajyaga abona. Nyuma y’imikino y’iki gikombe, aba banyamakuru bazakomeza kongera imbaraga mu biganiro bya siporo kuri Radio 1 na TV1.

KANDA HANO UREBE VIDEOS UTASANGA AHANDI