Uburyo Isheja Sandrine yateye imbere ahereye ku busa, byabera benshi urugero

Chief Editor | 4-06-2016
Uburyo Isheja Sandrine yateye imbere ahereye ku busa, byabera benshi urugero

Iyo umuntu akiri muto, aba afite inzozi z’aho yifuza kugera ndetse n’ibyo ashaka kuzageraho, nyamara kubigeraho biba bisaba kudacika intege ugashikama mu cyo wiyemeje kugeza ubwo uzabasha gukabya inzozi zawe. Kudateshuka ku ntego wihaye, gukorana umurava n’umuhate, nta kabuza bigeza umuntu ku ntsinzi.

Isheja Sandrine Butera, ni umukobwa ukora akazi k’itangazamakuru wahereye ku busa, afatanya impano yavukanye no gukora cyane bimugeza ku musaruro ushimishije, ibintu bikwiye kubera urugero n’abandi bakiri bato bafite ibyo bifuza kuzageraho.

Isheja Sandrine wamenyekanye cyane mu Rwanda nk’umwe mu bakobwa bagira ijwi ryiza ku ndangururamajwi, ntiyatangiye gukora itangazamakuru ari akazi, ahubwo ni ishuri yarerewemo rikuza impano ye, dore ko atanamaze imyaka myinshi akora itangazamakuru nk’akazi kamuhemba, ahubwo yigeze no kubikora neza atabihemberwa, ibyo bikaba biri no mu byamufashije cyane.

JPEG - 59.9 kb

Atangira kuvugira kuri Radio, yigaga muri Kaminuza y’u Rwanda maze kimwe na bagenzi be biganaga, akajya kwimenyereza kuri Radio Salus, nka Radio y’iyo Kaminuza aho yakoreraga ubuntu. Ageze mu mwaka wa gatatu wa Kaminuza, nibwo yaje gukorera i Kigali nabwo ari ukwimenyereza, abanziriza kuri Radio Isango Star, icyo gihe nabwo birumvikana ntabwo yahembwaga.
 
Nk’uko Sandrine yabitangaje mu kiganiro twagiranye mu minsi yashize, uburyo yitwaye ubwo yimenyerezaga akazi kuri Radio Isango Star, byatumye ahita abona akazi kamuhemba, n’ubwo atari menshi ariko icyo gihe yumvaga amunyuze nk’umunyeshuri. Isheja ati: "Ndangije Stage bambwiye ko bishimiye uburyo nkora maze bampa akazi. Nabwo nahembwaga macye ariko narishimye cyane numvaga ari akayabo kuko nari nkiri umunyeshuri kandi nari mvuye ku busa".

JPEG - 25 kb

Ubwo yageraga kuri Radio Isango Star, Isheja Sandrine yahasanze ikiganiro cyitwa Isango Relax Time ariko kuva ubwo arakivugurura agiha umurongo kigenderaho kugeza n’ubu, harimo nko kuvuga ku mafilime, ku ndirimbo, gusobanura amazina y’abantu n’utundi tudasanzwe twatumye gikundwa na benshi.

Gukora neza kuri Radio Isango Star, byatumye anyura ubuyobozi bwa Radio y’abanya Kenya yitwa K FM, maze muri 2013 baramwegera bamubwira ko basanze nta wundi utari we wakora ikiganiro cya saa sita kigakundwa kikanazamuka, maze nyuma yo kumvikana nabo ahita atangira icyitwaga M-Midmorning ariko kiza guhindura izina cyitwa K Connect. N’ubwo uyu mukobwa adasobanura iby’izamuka ry’umushahara, byumvikana neza ko iyi radio yamuhaye ibiruta ibyo yari asanzwe abona aho yarerewe kuri Isango Star.

Mu mwaka wa 2014, ubwo Radio nshya yitwa Kiss FM yatangiraga mu Rwanda, Isheja Sandrine niwe munyamakuru wa mbere wahise ahangwa amaso, arambagizwa nk’umunyamakuru w’umwuga washoboraga gutuma radio ikundwa, ndetse ninawe watangiye kuyikoraho bwa mbere dore ko abandi bahamusanze nyuma y’ibyumweru bibiri akora.

JPEG - 207.9 kb

Sandrine Isheja wize Itangazamakuru n’itumanaho muri Kaminuza, ubu yamaze no kwibikaho impamyabumenyi y’icyiciro cya gatatu cya Kaminuza mu bijyanye n’ubumenyi mu by’uburinganire n’ubwuzuzanye (Gender Studies). Uyu mukobwa wenda no gukora ubukwe n’umukunzi we, intambwe yagiye atera ayikesha umurava no gukunda ibyo akora akabishyiraho umutima.

KANDA HANO UREBE VIDEOS UTASANGA AHANDI