Umugore wa Danny Vumbi yambariye kumushyigikira no kumuyobora muri PGGSS6 - Amafoto & Video

Chief Editor | 14-05-2016
Umugore wa Danny Vumbi yambariye kumushyigikira no kumuyobora muri PGGSS6 - Amafoto & Video

Jeannette Muhawenimana, ni umugore w’umuhanzi Semivumbi Daniel, wamamaye muri muzika nyarwanda nka Danny Vumbi. Uyu mubyeyi w’abana babiri yabyaranye na Danny Vumbi, asanzwe ashyigikira umugabo we mu bikorwa bye bya muzika, ariko ubu by’umwihariko niwe mujyanama we "manager" mu marushanwa ya Primus Guma Guma Super Star 6.

Danny Vumbi uri mu bahanzi 10 bahatanira ibihembo bya Primus Guma Guma Super Star y’uyu mwaka, ni ubwa mbere agiye muri aya marushanwa ariko intego si ukwitwara neza gusa, ahubwo yiyemeje no kwegukana igikombe. Ibi abyizera ashingiye ku ndirimbo ze zikunzwe nka Ni Danger, Baragowe, n’iyitwa Ni Uwacu bamwe bakunda kwita Umusinzi, ariko ibi byonyine siyo ntwaro yitwaje, ahubwo yanashatse umujyanama uzajya umuyobora akamufasha mu bijyanye no kumenya uburyo bwiza bwo gushimisha abakunzi be muri ibi bitaramo.

Muhawenimana Jeannette; umugore wa Danny Vumbi urimo kumufasha nka ’Manager"

Mu gushaka umujyanama, Danny Vumbi ntiyagiye kure, kuko yahise ahitamo umugore we Jeannette bakunda kwita "Mama Jay-Z", dore ko umwana wabo w’imfura yitiranwa n’icyamamare muri muzika, Jay-Z w’umunyamerika.

Mama Jay-Z asanzwe ashyigikira umugabo we ariko byabaye akarusho muri PGGSS6

Mu gitondo cyo kuri uyu wa Gatandatu tariki 14 Gicurasi 2016, umunsi ibitaramo bya Primus Guma Guma Super Star 6 bigomba gutangirira i Gicumbi, Ikinyamakuru Ukwezi.com cyasanze uyu mugore wa Danny Vumbi i Nyamirambo mu mujyi wa Kigali, yagiye kureba ababyinnyi bagomba kujya babyinira umugabo we muri aya marushanwa.

Umugore wa Danny Vumbi aha yari kumwe n’ababyinnyi bagomba kubyinira umugabo we, buri kintu cyose ni we ukimenya

Mu kiganiro twagiranye, yashimangiye ko intego ari ukwegukana igikombe, kandi bakaba barabyiteguye bihagije kuburyo nta kabuza ibi bazabigeraho. Inama, kumuba hafi nk’umukunzi w’ibihangano bye, bizajya binajyana no kumwitaho nk’umufasha bashakanye, ibi byose ngo bizabageze ku ntera yo kwegukana igikombe.

REBA HANO AKA VIDEO GATO K’IKIGANIRO TWAGIRANYE:

Uyu mugore kandi yasabye abakunzi ba Danny Vumbi bose, ko bamutora binyuze mu butumwa bugufi (SMS), bakohereza 5 kuri 4343 bakaba bahaye amahirwe Danny Vumbi.

KANDA HANO UREBE VIDEOS UTASANGA AHANDI