Umuhanzi Kidum agiye kujya iwabo i Burundi n’ubwo yamenyeshejwe ko bazahamwicira

Chief Editor | 16-08-2016
Umuhanzi Kidum agiye kujya iwabo i Burundi n’ubwo yamenyeshejwe ko bazahamwicira

Nimbona Jean Pierre, umuhanzi w’Umurundi uzwi ku mazina ya Kidum Kibido Kibuganizo, avuga ko hari abantu bo mu gihugu cye bamubwiye ko bagiye kumwica ariko akaba yitegura kujya i Burundi igishaka kikaba.

Kidum ukunze kuba mu gihugu cya Kenya ndetse akaba asanzwe azenguruka ibihugu bitandukanye akora ibitaramo, yanditse ku rubuga rwa facebook amagambo agaragaza ko hari abantu barimo guhimba amayeri ngo bamwerekane nk’urwanya Leta y’u Burundi ndetse akaba yaraburiwe ko nasubira mu gihugu cye azicwa, ariko bikaba bitazamubuza kujyayo.

Yagize ati: "Muntu waba urimo gutegura kwica njyewe Kibido Kibuganizo hanyuma ukantega imitego kuri Facebook wiyita amazina y’abantu bafitanye ibibazo na Leta y’u Burundi, njyewe sindi umunyabwoba ngo watuma ntinya kuza iwacu. Nzagera aho i Bujumbura ku itariki ya mbere z’uku kwezi kwa cyenda, tegura neza uko uzanyica rero kuko ngomba kuza mu gihugu cyanjye cy’amavuko. Uzaba umfashije kuko nzaba mpfiriye mu gihugu cya sogokuru wanjye. Bitegure neza kandi ubikore, amayeri yo kwiyita amazina y’abarwanya Leta unyitiranya n’abari mu bayirwanya nayamenye kera! Yewe, njyewe sindi muri ibyo bya politiki, ntunzwe no kuririmba gusa. Ibyo nabyo niba ari ikibazo, sindi mu bazabireka vuba. Imana niyonkuru, ndaje ikiba kibe!”

Igihugu cy’u Burundi kirimo ibibazo by’ubwicanyi bwa hato na hato buhitana abantu mu ngeri zitandukanye barimo abasirikare bakuru, abayobozi mu nzego nkuru z’igihugu n’abaturage basanzwe, izi mpfu Leta ikaba izishinja abatavuga rumwe nayo nyamara abatari bacye nabo bakavuga ko ari ubutegetsi bwikiza abatabushyigikiye.

KANDA HANO UREBE VIDEOS UTASANGA AHANDI