Umuhanzi Mr Nice yatewe n’ibisambo bimumaraho utwo yari afite twose

Rukundo Irené | 7-10-2016
Umuhanzi Mr Nice yatewe n’ibisambo bimumaraho utwo yari afite twose

Benshi baramukunze mu muziki we dore ko hari mu bihe abahanzi bari bakiri bake haba mu Rwanda ndetse no mu bindi bihugu byo muri Afurika y’Uburasirazuba. Yagiye akora indirimbo nyinshi aho mu mwaka 2002 yakoze alubumu yise “kidali po”, indirimbo ze zarakunzwe karahava. Amazina ye ubusanzwe ni Lucas Mkenda, avuka mu gihugu cya Tanzania. Uyu mugabo rero mu ijoro ryo kuri uyu wa Kane akaba yinjiriwe n’ibisambo maze bimwiba telelefone 2, laptop ndetse n’amafaranga angana na millioni 30 z’amashiringi ya Tanzania.

Mr nice yari amaze igihe kigera ku mezi 6 ari mu gihugu cya Kenya aho yari ari mu bikorwa by’umuziki ndetse ari nako akora n’ibitaramo bigiye bitandukanye. Ibijyanye no kuba yibwe byamenyekanye kuri uyu wa Gatanu ubwo ikinyamakuru Bongo5.com dukesha iyi nkuru cyavuganaga nawe kimubaza ku nkuru y’uko yaba yatewe n’ibisambo. Mr Nice akaba yavuze ko bi bisambo byaje bikamusanga muri Hoteli yari acumbitsemo, kandi iyi hoteli ikaba yari yakodeshejwe na kompanyi yari irimo kumufasha mu bijyanye no gukora ibitaramo.

Mr Nice yagize ati: ”Natewe n’ibisambo binyiba buri kintu cyose nari mfite ndetse n’amafaranga nari mfite agera kuri miliyoni 30 z’amashiringi ya Tanzania bayajyanye, imodoka yanjye bayangije bayimena ibirahure, bajyana laptop, telefone 2, imyenda ndetse n’inkweto byose barikorera kandi na passport bayijyanye mu gikapu cyarimo imyenda. Byari bikaze cyane abajura bari benshi bagera nko kuri 7 kandi babiri muri bo bari bafite imbunda, nikanze nkeka ko ari Al shabaab ariko bakimara gufata ibintu bakagenda nibwo namenye ko ari ibisambo."

Mr Nice yakomeje yishimira kuba we bamusize amahoro ndetse avuga ko uburyo baje kumwiba byagaragazaga ko hari umuntu wari wababwiye ko afite amafaranga aho araye, kuko muri uwo mugoroba ngo nibwo yari avuye kuyafata. Hari saa tanu z’ijoro kandi ngo nta handi hantu yari kuyashyira usibye gutegereza ko bucya akayakoresha ibyo yari ateganyirijwe. Muri ayo masaha we n’abo bari kumwe, bakimara kwinjira mu gipangu nibwo n’abajura binjiye bariba barangije baragenda.

Kugeza ubu Polisi ya Kenya ikomeje gukurikirana ikibazo cya Mr Nice ngo irebe ko yafata abamwibye ndetse na Mr Nice akaba yasabye ko uwabona ibyangombwa bye by’ingendo yabigeza ku cyicaro cya Polisi kimwegereye muri Kenya gusa ngo agiye gukomeza ibikorwa arimo muri icyo gihugu.

KANDA HANO UREBE VIDEOS UTASANGA AHANDI