Urugomo rwa Justin Bieber rwamushyize mu kaga, ubu ararihishwa telefone y’arenga 79.000.000

Chief Editor | 6-05-2016
Urugomo rwa Justin Bieber rwamushyize mu kaga, ubu ararihishwa telefone y’arenga 79.000.000

Nyuma y’igihe atavugwaho urugomo n’amahane, umuhanzi w’icyamamare Justin Bieber ukomoka muri Canada ariko ukorera muzika ye muri Leta Zunze Ubumwe za Amerika, yongeye kwishyira mu kaga ubu akaba arimo kwishyuzwa akayabo k’amadolari ya Amerika 100.000, ni ukuvuga abarirwa muri 79.000.000 uyabaze mu mafaranga y’u Rwanda.

Nk’uko ikinyamakuru TMZ kibivuga, intandaro y’ibi byose yabaye mu mpera z’icyumweru gishize ubwo Justin Bieber yasohokeraga mu kabyiniro, akaza kubona umwe mu bafana be wari urimo kumufata amashusho rwihishwa akoresheje telefone ye igendanwa, ibi uyu muhanzi akaba atarigeze abyihanganira na gato kuko yahise ayifata arayimenagura ayihindura ubushwange.

Nyiri iyi telefone witwa Robert Earl Morgan, yahise ajyana Justin Bieber mu butabera, ubu akaba arimo kumwishyuza akayabo k’amadolari ya Leta Zunze Ubumwe za Amerika angana n’ibihumbi ijana (100.000 $), ni ukuvuga akabakaba 79.000.000 uyabaze mu mafaranga y’u Rwanda.

Kuba iyi telefona ihabwa agaciro gahambaye, si uko yo ubwayo ihenze cyane, ahubwo Robert Earl Morgan yabwiye urukiko ko iyi telefone yamenaguritse bigatuma simukadi (SIM Card) yayo iburirwa irengero kandi yari iriho ibintu byinshi akeneye, hakiyongeraho kuba telefone ye yari irimo amafoto arenga 5,000 n’ama ’videos’ menshi byose yafashe mu gihe yari mu biruhuko, hakiyongeraho ama nomero n’indi myirondoro y’abantu akenera cyane mu kazi, by’umwihariko hakaba hari harimo n’amafoto ya nyirakuru yagiye afatwa mu bihe bitandukanye by’imyaka myinshi, bityo aka kayabo asaba Justin Bieber kakaba kajyanye n’agaciro k’ibyo yavukijwe ku bwa telefone ye Justin Bieber yamennye.

Justin Bieber urimo kwishyuzwa aka kayabo, muri iryo joro yangije telefone y’umwe mu bakunzi be hari n’umuraperi witwa Post Malone yiyenjejejo amutwikisha itabi yanywaga, gusa uyu we yahisemo kutabikomeza ngo amugeze imbere y’ubutabera.

KANDA HANO UREBE VIDEOS UTASANGA AHANDI