Abarundi bari mu kaga kubera ingamba Tanzania yafashe ku mupaka n’igihugu cyabo

Chief Editor | 21-07-2016
Abarundi bari mu kaga kubera ingamba Tanzania yafashe ku mupaka n’igihugu cyabo

Hashize igihe kirenga icyumweru, ku mupaka wa Tanzania n’u Burundi hakumirwa imodoka zishaka kwambukana ibicuruzwa bimwe na bimwe biva muri Tanzania bijya muri iki gihugu cy’u Burundi, ibintu byatangiye guhungabanya u Burundi kandi bishobora kurushaho kubabera ikibazo.

Mu bicuruzwa bikumirwa, higanjemo umuceri, ibishyimbo, ifu y’imyumbati, iy’ibigori izwi nka kawunga, amavuta yo guteka n’ibindi biribwa bitandukanye. Abarundi baturiye umupaka cyane cyane abo mu ntara ya Makamba no muri Komine Muyinga, batangiye kugerwaho n’izi ngaruka, aho kubona ibiribwa byatangiye kuba ingorabahizi.

Kuri iyi foto hagaragaraho amakamyo menshi yahagaritswe hafi y’umupaka wa Tanzania n’u Burundi.

Bivugwa ko abayobozi b’igihugu cya Tanzania bafashe iki cyemezo cyo kubuza amakamyo apakiye ibiribwa kwambuka umupaka ubahuza n’u Burundi, kuko babonaga abaturage bagurisha ibiribwa byinshi muri iki gihugu bo bagasigara batabona ibibatunga bihagije.

Mu gihe iki cyemezo cyakomeza, igihugu cy’u Burundi gisanzwe gifite ikibazo cy’umusaruro muto cyane w’ibiribwa, cyahura n’akaga gakomeye k’inzara n’ubundi isanzwe yibasira abatari bacye mu basigaye mu gihugu, mu gihe abandi basaga 250.000 bo bahungiye mu Rwanda, Tanzania na Repubulika Iharanira Demokarasi ya Kongo.

KANDA HANO UREBE VIDEOS UTASANGA AHANDI