Aho kwicwa n’ubukene, abaturage bemera kugurisha impyiko zabo bagahabwa hafi 3.700.000

Chief Editor | 26-08-2016
Aho kwicwa n’ubukene, abaturage bemera kugurisha impyiko zabo bagahabwa hafi 3.700.000

Amategeko y’igihugu cya Iran, yemerera abaturage kugurisha impyiko zabo bagahabwa akayabo, ndetse n’abazikeneye bakemera kuzigura n’abantu bakiriho, umuntu akaba yakuramo impyiko imwe akayigurisha ngo yikure mu bukene. Nk’uko bajya navuga ngo uwanze kwiba ateza utwe, muri Iran naho ntawe ukena afite impyiko ze ebyiri.

Ibi byagabanyije cyane umubare w’abantu muri Iran babaga bategereje kuzabona umuntu uzabaha impyiko kuko abaturage batangiye kujya bazikenuza guhera mu 1999, ikibazo cy’ibura ry’uru rugingo kikaba kinari henshi mu bihugu by’u Burayi na Leta Zunze Ubumwe za Amerika aho ibihumbi byinshi by’abantu bapfa buri mwaka nyuma y’igihe barabuze ubaha impyiko.

JPEG - 76.2 kb

Uyu yitwa Sajjad Ghanbari, aha yakorerwaga ibizamini kugirango ahite agurisha impyiko ye mu bitaro biri mu mujyi wa Tehran

Ubusanzwe abantu bafite uburwayi bw’impyiko bakenera guhabwa imwe ituma babaho, bayihabwa n’abantu b’inshuti zabo cyangwa abandi bo mu miryango bemera kubitangira, cyangwa se umuntu wapfuye akaba yakurwamo impyiko izahabwa abandi bazikeneye. Muri Iran ariko siko bimeze, upfa kuba ufite amadolari yawe 4,500 angana n’amanyarwanda hafi 3.700.000, ubundi umuntu muzima mutanaziranye akaguha impyiko ye nawe ukamwishyura.

Imiryango mpuzamahanga itandukanye irimo n’ishami ry’Umuryango w’Abibumbye ryita ku buzima (OMS) yamagana iby’ubu bucuruzi bw’ingingo z’umubiri w’umuntu, isaba ko yajya itangwa ku buntu n’abagiraneza cyangwa hagakoreshwa iy’abantu bapfuye, nyamara ku rundi ruhande hakaba abagaragaza ko iyaba ubu buryo bwakoreshwaga mu bihugu bifite umubare munini w’ababuze impyiko, byajya bibafasha abantu ntibapfe.

JPEG - 96.2 kb

Ufite ubukene ajya kwisuzumisha basanga impyiko ze zombi ari nzima, imwe akayigurisha akimara ubukene

Ibi kandi n’ubwo byemewe muri Iran, hari n’ibindi bihugu bikora ubucuruzi bw’impyiko mu buryo bw’amanyanga, nko mu Buhinde, Philippines na Pakistan, aho umuntu ashobora kwigurishiriza impyiko mu ibanga n’ubwo amategeko y’igihugu yaba atabyemera.

Umwe mu baganga bashinzwe ibikorwa byo gutera impyiko mu bantu mu gihugu cya Iran unayobora urugaga rujyanye nabyo, yabwiye ibiro ntaramakuru by’Abanyamerika ko abantu benshi bafite ibibazo by’ubukene bahitamo kugurisha impyiko zabo kugirango bikenure, ariko hakaba hari n’umubare muto cyane w’abemera gutanga impyiko zabo ku buntu ku bw’ubugiraneza.

JPEG - 101.7 kb

Batora umurongo basaba ko bakurwamo impyiko igahabwa abayikeneye ubundi bakibonera agatubutse

KANDA HANO UREBE VIDEOS UTASANGA AHANDI