Icyorezo cya Zika cyatumye hafatwa ingamba zikomeye muri Amerika

Rukundo Irené | 2-08-2016
Icyorezo cya Zika cyatumye hafatwa ingamba zikomeye muri Amerika

Nyuma y’aho bigaragariye ko icyorezo cya Zika gikomeje kugariza abaturage batuye Leta ya Florida mu mujyi wa Miami muri Leta Zunze Ubumwe za Amerika, abashakashatsi mu bijyanye n’ubuzima baragira inama abaturage guhagarika ingendo bateganya gukorera muri uyu mujyi.

Mu bagirwa inama cyane yo kwitondera kujya muri Miami, agace kazwiho gukorerwamo ibikorwa bijyanye n’ubucuruzi cyane ndetse n’ibijyanye n’imyidagaduro, harimo abagore batwite kubera ikibazo cy’icyo cyorezo gikomeje kuhagaragara. Ibi babitangaje nyuma yo kugaragaga ko hamaze kuboneka abantu 14 bagaragayeho iki cyorezo.

Muri aba bantu bagaragayeho iyi ndwara, byagaragaye ko babiri ari abagore abandi 12 bakaba ari abagabo. Agace kagaragayemo iki cyorezo gaherereye mu majyaruguru ya Miami, ni mu karere kitwa Wynwood.

Ihuriro ry’abashinzwe gukurikirana ndetse no gukumira indwara z’ibyorezo ryakomeje ritanga ubutumwa ku baturage ko abagore n’abagabo bari bamaze igihe gito bakoreye ingendo muri aka gace bagomba gutegereza byibuze ibyumweru 8 kugirango umugore abe yabasha gusama, mu buryo bwo kwirinda ko umwana wabo yazavukana uburwayi buterwa n’iyi virusi ya Zika.

Abagabo bafite utu dukoko, dushobora kwihisha mu ntanga zabo mu gihe kigeze ku mezi atandatu mbere y’uko habayeho igikorwa cyo kuba bagerageza kubyara, bityo bakaba bagomba gutegereza amezi 8 kugirango bitazagira ingaruka ku mwana uvutse.

Umuyobozi wa Florida, Rick Scott, akaba yatangaje ko bagiye gukomeza gufasha abaturage kurwanya ndetse no kwirinda iki cyorezo hafatwa ingamba zikomeye, harimo kubashishikariza gukomeza kwirinda ahantu hose hari ibizenga by’amazi bakahakora neza kuko ariho hatuma imibu ikomeza kororoka igakomeza gukwirakwiza indwara mu baturage.

BBC dukesha iyi nkuru ivuga ko abantu bagera kuri 200 bapimwe iyi ndwara ya Zika ubwo yagaragara bwa mbere muri aka gace ka Miami mu kwezi gushize kwa Nyakanga hagamijwe kurinda ko yakomeza gukwirakwira ahantu hanini.

KANDA HANO UREBE VIDEOS UTASANGA AHANDI