Ikindi gihugu cya Afurika cyemereye abahuje igitsina gushyingiranwa

Chief Editor | 19-05-2016
Ikindi gihugu cya Afurika cyemereye abahuje igitsina gushyingiranwa

Inteko Ishinga Amategeko yo mu birwa bya Seychelles biherereye ku mugabane wa Afurika, yamaze gushyira umukono ku itegeko ryemerera abagabo gusezerana byemewe n’amategeko ndetse n’abagore bakaba basezerana n’abandi bagore.

Iri tegeko ryatowe nyuma y’uko Perezida w’iki gihugu James Michel, atangarije mu ijambo rye yavuze muri Gashyantare uyu mwaka, ko ashaka gukuraho itegeko ribangamira abakundana basangiye igitsina kuba bakwishakanira.

Nyuma y’uko Inteko Ishinga Amategeko yemeje itegeko riha uburenganzira abahuje igitsina kuba bakwishakanira, abayobozi b’amadini n’amatorero atandukanye cyane cyane kiliziya gaturika, babyamaganiye kure bavuga ko gushyingiranwa kw’abahuje igitsina bihabanye n’amategeko y’Imana.

Ku rundi ruhande ariko, abadepite mu Nteko Ishinga Amategeko y’ibirwa bya Seychelles, bo bavuga ko Itegeko Nshinga ryabo riha uburenganzira bungana abantu bose, bityo abashaka gushyingiranwa na bagenzi babo bahuje igitsina bakaba badakwiye kubizira.

Seychelles ibaye igihugu cya kabiri cyo muri Afurika gihaye uburenganzira abatinganyi, nyuma y’uko Afurika y’Epfo yabyemeye mu mwaka wa 2006.

KANDA HANO UREBE VIDEOS UTASANGA AHANDI