Karla akomeje gutanga ubuhamya bw’ukuntu yasambanye n’abagabo basaga 43.200

Chief Editor | 29-09-2016
Karla akomeje gutanga ubuhamya bw’ukuntu yasambanye n’abagabo basaga 43.200

Umukobwa witwa Karla Jacinto ukomoka mu gihugu cya Mexique, aherutse guhamya ko yafashwe ku ngufu inshuro zigera ku 43.200 mu myaka ine, nyuma yo kugwa mu mutego w’abakora ubucuruzi bw’abantu, uyu mubare ukaba ari impuzandengo abara ahereye ku kuba ku munsi yarasambanywaga n’abagabo barenga 30.

Mu buhamya Karla Jacinto yahaye CNN, hagaragaramo uburyo ubucuruzi bw’abantu muri Mexico no mu muri Leta Zunze Ubumwe za Amerika buteye inkeke, hakaba habarurwa kugeza ubu abakobwa nk’uyu Karla Jacinto barenga 10.000 bangirijwe ubuzima nyuma yo kugwa mu mutego w’abakora ubucuruzi bw’abantu.

Ubucuruzi bw’abantu bumaze gufata indi ntera muri Mexico no mu mijyi yo hagati muri Leta Zunze Ubumwe za Amerika nko muri Atlanta na New York. Abayobozi bo muri Leta Zunze Ubumwe za Amerika no muri Mexico, batunga agatoki umujyi witwa Tenancingo uherereye rwagati mu gihugu cya Mexique, nk’indiri y’abakora ubucuruzi bw’abantu ndetse hakaba ari naho hafatirwa abajya gukoreshwa ubusambanyi ku gahato. Abakobwa benshi bakomoka mu bice by’ibyaro, bagana uyu mujyi bazi ko bazawuboneramo ubuzima bwiza nyamara bikarangira bashutswe bakajyanwa gucuruzwa, bagasambanywa by’indengakamere.

Karla Jacinto avuga ko yahohotewe birenze urugero, kuko yatangiye gusambanywa n’umuntu wo mu muryango we afite imyaka 5 gusa y’amavuko. Ubwo yari afite imyaka 12, yashutswe n’umuntu wakoraga ubucuruzi bw’abantu, amubeshyeshya amagambo asize umunyu anamubwira uburyo nawe ubwo yari umuhungu ukiri muto yahohotewe, bituma Karla Jacinto yumva amugiriye impuhwe agenda amwiyumvamo. Baje guhana nimero za telefone, nyuma uyu musore wari mukuru kuri we aza kumuhamagara barahura amusaba ko batemberana, undi kubera icyizere yari yamaze kumugirira nawe ntiyazuyaza aremera baratemberana.

Baje gutaha batinze, hanyuma bageze iwabo nyina wa Karla yanga kumukingurira muri icyo gicuku, uwo musore wamurushaga imyaka 10 y’amavuko icyo gihe kuko yari afite imyaka 22, amusaba ko bakwijyanira. Baragiye babana amezi atatu, uwo musore amufata neza cyane, amwereka ko amukunda bihebuje ndetse amugurira imyenda, inkweto, indabo n’utundi tuntu twiza twatumye uyu mwana w’umukobwa yishima akumva ko aryohewe n’ubuzima.

Karla avuga ko uwo musore wari wamaze kuba umukunzi we, yashoboraga kumusiga mu nzu babanagamo, akagenda akamara icyumweru ataragaruka, yaragiye mu bucuruzi bw’abantu ariko Karla akaba yari atarabimenya. Karla yahoraga abona babyara b’uwo mukunzi we bazana abakobwa bashya buri munsi, maze aza kubaza umukunzi we ubucuruzi babyara be barimo, maze amubwiza ukuri amubwira ko babyara be bakora akazi ko kurangira abakiliya babo abakobwa bakoresha akazi k’uburaya. Ibi ariko nawe byaje kumugeraho mu minsi micye, uwo yitaba umukunzi we atangira kumubwira uburyo azajya afata abashaka gusambana nawe.

Karla Jacinto ati: "Nyuma y’iminsi micye yatangiye kumbwira buri kimwe cyose nagombaga gukora, ambwira uburyo nzajya nitwara mu buriri, amafaranga nzajya mbaca, ibyo ngomba kujya nkorana n’umukiliya ndetse n’igihe tugomba kumarana, uburyo nzajya mbafata n’uko nzajya mbavugisha kugirango bampe amafaranga atubutse."

Karla avuga ko icyo gihe cyabaye intangiriro yo kwinjira mu buzima bumeze nk’ubw’ikuzimu yamazemo imyaka ine. Ubwa mbere yakoreshejwe uburaya ku gahato, yajyanwe mu mujyi wa Guadalajara, umwe mu mijyi minini cyane yo mu gihugu cya Mexique ahoy amaze icyumweru bamusambanya ubutitsa.

Ati:"Natangiye gusambanywa saa yine za mu gitondo, bigeza mu gicuku. Twamaze icyumweru mu mujyi wa Guadalajara, nsambanywa inshuro 20 ku munsi mu gihe cy’icyumweru cyose nta gusiba umunsi n’umwe. Abagabo bamwe babaga bansambanya, babonaga ndira bo bakanseka. Nafungaga amaso kugirango ntakomeza kureba ibyo barimo kunkorera."

Uyu mukobwa avuga ko yagiye ajyanwa mu mijyi itandukanye, akajyanwa mu mazu akorerwamo uburaya, mu mazu y’abantu ku giti cyabo bamusambanyirizagamo, mu mahoteli n’ahandi hatandukanye kandi nta munsi w’ikiruhuko wabagaho, bagombaga kumusambanya buri munsi. Nyuma y’iminsi micye, yagombaga kuryamana n’abagabo 30 buri munsi nta gusiba na rimwe.

Karla avuga ko uwo yitaga umukunzi we ari nawe wamwinjije muri ubu buzima, igihe cyaje kugera akamukubita umubiri wose akoresheje umunyururu, akamukurura imisatsi, akamuhohotera bikomeye kugeza ubwo yaje no kumutwika akoresheje ipasi ishyushye. Karla yamubwiye ko ashaka kwigendera, undi amubera ibamba kuko yamweretse ko agomba gukomeza gukora uburaya.

Umunsi umwe ubwo yari muri hoteli yari izwiho gukorerwamo uburaya, Polisi yarahageze maze bata muri yombi abakiriya bose, hoteli bahita bayifunga. Icyo gihe Karla yari azi ko agize amahirwe we na bagenzi be, bakaba bagiye gutabarwa na Polisi ikabavana muri ubwo buzima.

Karla wari ufite imyaka 13 gusa icyo gihe, avuga ko ibyo yitaga amahirwe yaje kubibonamo akaga gakomeye ubwo abo bapolisi bageraga muri 30, bafataga abo bakobwa bose bakabajyana mu byumba bitandukanye by’iyo hoteli, barangiza bagatangira kubafata amashusho bambaye ubusa bakababwira ko amashusho babafashe bazayoherereza imiryango yabo nibaramuka banze kuryamana nabo, ibintu byatumye agwa mu rujijo ntasobanukirwe niba koko bari abapolisi cyangwa niba ari abari babyiyitiriye.

Karla Jacinto ati:"Natekerezaga ko babihiwe n’uko twari tumeze kuko twanasaga nabi. Bari bazi ko tutujuje imyaka y’ubukure, kandi twagaragazaga amasura yijimye. Muri twe hari harimo abakobwa b’imyaka 10 gusa y’amavuko, kandi bose bari barimo kurira. Twabwiye abo bapolisi ko turi abana batujuje imyaka y’ubukure ariko ntawigeze abyitaho."

Ubu buzima Karla yaje no kubutwariramo inda, abyara umwana w’umukobwa ku myaka 15 gusa y’amavuko yabyaranye n’uwamukoreshaga uburaya ku gahato. Uwo mugabo bamubyaranye, yafataga urwo ruhinja akamubwira ko naramuka atubahirije ibyo amubwira byose, azahita yica urwo ruhinja babyaranye. Igihe cyaje kugera uwo mugabo babyaranye afata urwo ruhinja aruhungisha nyina, biza kugera ubwo rwagize umwaka urenga rutarongera kubonana na nyina.

Karla Jacinto yaje gutabarwa mu mwaka wa 2008, ubwo habaga igikorwa cyo kurwanya ubucuruzi bw’abantu mu mujyi wa Mexico. Ubuzima bubi bwo gukoreshwa uburaya ku gahato yabumazemo imyaka ine, kuko yabugiyemo afite imyaka 12 akabuvamo afite imyaka 16 y’amavuko, ariko avuga ko bwamuteye ibikomere by’ubuzima bwe bwose. Iyo abaze ahereye ku mubare w’abagabo yabaga ategetswe gusambana nabo buri munsi, asanga impuzandengo y’abo baryamanye ari abagabo 43.200.

Kugeza ubu Karla Jacinto afite imyaka 23 y’amavuko, akaba asigaye atanga ubuhamya mu manama n’ibikorwa bitandukanye ahaba hatangwa ubutumwa bwo kurwanya no kwamabana ubucuruzi bw’abantu. Iyi nkuru ye, yanayibwiye Papa Fransisiko muri Nyakanga uyu mwaka, i Vatican mu gihugu cy’u Butaliyani. Yanatanze ubuhamya bwe kandi mu Ihuriro rya Leta Zunze Ubumwe za Amerika ryabaye muri Gicurasi.

Ubuhamya bwe bwakoreshejwe n’inzego zitandukanye nk’ikimenyetso gifatika cy’uburemere bw’icuruzwa ry’abantu. Ubutumwa atanga ashingiye kubyo yabonye kandi yabayemo, ni ubw’uko ikibazo cy’ubucuruzi bw’abantu bakoreshwa uburaya ku gahato, kigenda gifata indi ntera kandi kikaba cyugarije isi.

KANDA HANO UREBE VIDEOS UTASANGA AHANDI