Umugabo ufite umugore n’abana yasiramuwe ku ngufu nyuma y’igihe yihishahisha

Chief Editor | 19-08-2016
Umugabo ufite umugore n’abana yasiramuwe ku ngufu nyuma y’igihe yihishahisha

Aha umwana ararizwa no guterwa ubwoba n’ibikorerwa uwasiramuwe

Umugabo w’imyaka 31 y’amavuko wo mu gace ka Bungoma mu gihugu cya Kenya, yafashwe n’abaturanyi be bamusiramura ku ngufu nyuma y’imyaka irenga 10 yihishahisha ngo adakorerwa iki gikorwa.

Kuri uyu wa Kane tariki 18 Kanama 2016, nibwo Kevin Juma Wekesa yakebwe (yasiramuwe) ku ngufu nyuma y’igihe kirekire abihunga, mu gihe mu muco w’abatuye muri aka gace no mu bindi bice bitandukanye bya Kenya, gukorerwaho uyu muhango ari nk’ihame ridakuka, utawukoreweho akaba asuzugurwa cyane.

Umwe mu baturage ba Bungoma, yabwiye ikinyamakuru Edaily ko buri wese afite imyaka ntarengwa agomba kuba yakekwe. Yagize ati: "Buri musore agomba gukebwa mbere y’uko agira imyaka 18, iyo bitabayeho ntabwo abarwa nk’umuntu mukuru, akomeza gusuzugurwa kuko afatwa nk’umwana muto. Ugerageje guhunga ngo adakorerwa uyu muhango, ubundi biba biteganyijwe ko hari amafaranga azacibwa aho azagarukira."

Nyuma y’uko Juma Kevin Wekesa akoreweho uyu muhango, Se wabo witwa Julius Ngongesa yagaragaje ibyishimo yatewe n’uko umwana wabo yabaye umuntu mukuru byemewe n’umuco w’abatuye mu gace ka Bungoma. Uyu Kevin Juma, n’ubwo yafatwaga nk’umwana kuko atasiramuwe, ni umugabo ufite umugore n’abana babiri.

KANDA HANO UREBE VIDEOS UTASANGA AHANDI