Menya amwe mu mateka ya Hillary Clinton uhatanira kuba Perezida wa Amerika

Paola Abizera | 25-07-2016
Menya amwe mu mateka ya Hillary Clinton uhatanira kuba Perezida wa Amerika

Hillary Diane Rhodham Clinton ubarizwa mu ishyaka ry’aba demokarate muri Leta Zunze Ubumwe za Amerika, yavutse tariki ya 26 Ukwakira 1947, akaba yaravukiye muri Chicago, akaba avukana n’abahungu babiri gusa ari bo Hugh na Tony.

Hillary Clinton yavukiye mu muryango w’abakirisitu bo mu itorero ry’abametodisiti (Methodist), ababyeyi be bamujyanaga buri gihe gusenga we na basaza be. Kuva akiri muto yakundaga politiki, kandi yari n’umuhanga cyane mu ishuri.

Mu 1965, Hillary Cliton yagiye kwigwa amashuri ye yisumbuye ku kigo cy’abakobwa gusa kandi baturukaga mu miryango ikize cyitwa Wellesley College, naho mu 1970 yaje kujya muri kaminuza yitwa Yale aho yakurikiranye ibijyanye n’amategeko.
Mu nzu y’ibitabo (library) byo muri Kaminuza yigagaho niho yaje guhurira na Bill Clinton, hari mu mwaka w’1973.

Mu mwaka w’1975, Bill Clinton yaje gufata icyemezo cyo kujya muri politiki afatanyije na Hillary baje gushyingiranwa muri uwo mwaka. Muri Gashyantare 1980 baje kwibaruka umwana w’umukobwa witwa Chelsea, baje no kubona umwuzukuru witwa Charlotte wavutse tariki 27/09/2014. Hillary Clinton yakomeje umwuga ujyanye n’ibyo yize, aho yaje kuba umwunganizi mu by’amategeko (avoka) naho umugabo we Bill Clinton mu 1978 yaje kuba guverineri wa Arkansas.

Uyu muryango waje kwinjira mu nyubako igenewe umuryango wa Perezida Zunze Ubumwe za Amerika, muri White-House muri Mutarama 1993, ubwo Bill Clinton yatorerwaga kuba Perezida wa Leta Zunze Ubumwe za Amerika. Mu kwezi k’Ukwakira 2000, nibwo Hillary Clinton yatorewe kuba senateri wa Leta ya New York mbere y’uko ava muri White-house.

Muri 2008, Hillary Clinton yaje kwiyamariza kuba Perezida wa Leta Zunze Ubumwe za Amerika ariko yaje gutsindwa na Barack Obama. Muri Mutarama 2009, yaje gutorerwa kuba umunyabanga w’ububanyi n’amahanga wa Leta Zunze Ubumwe za Amerika.

Muri Mata 2015, nibwo yatangaje ko aziyamamariza kuba Perezida muri 2016, kugeza ubu Hillary Clinton akaba ari we uhanganye na Donald Trump uturuka mu ishyaka ry’abarepubulika.

KANDA HANO UREBE VIDEOS UTASANGA AHANDI