Niba unywa inzoga itonde, hari ubwoko 7 bwa kanseri ushobora kurwara

Chief Editor | 22-07-2016
Niba unywa inzoga itonde, hari ubwoko 7 bwa kanseri ushobora kurwara

Ubushakashatsi bushya bwakozwe ku ihuriro riri hagati y’indwara ya Kanseri (Cancer) n’inzoga, bwerekanye ko inzoga zishobora kuba intandaro y’ubwoko burindwi bwa kanseri ndetse bikaba bishoboka ko hari n’ubundi bwoko bw’iyi ndwara bushobora guterwa n’inzoga.

Ubu bushakashatsi bwakozwe ndetse n’ubu bukaba bukirimo gukorwa ngo harebwe niba nta bundi bwoko bwa Kanseri burenze burindwi bushobora guterwa n’inzoga , bwerekana ko inzoga zigira uruhare rudashidikanywaho mu guteza indwara ya Kanseri.

Nk’uko byasohotse mu kinyamakuru ’Addiction’, umushakashatsi Jennie Connor wo muri Kaminuza ya Otago muri New Zealand uri mu itsinda ry’abahanga bakoze ubu bushakashatsi, avuga ko inzoga zateje impfu z’abantu bakabakaba 500.000 mu mwaka wa 2012, bishwe na Kanseri yazikomotseho, bivuga ko inzoga zishobora guteza 5.8 % by’impfu zikomoka kuri ubu burwayi muri risange.

Ubu bushakashatsi bugaragaza ko abashobora kwibasirwa cyane n’izi kanseri ari abanywa inzoga nyinshi, ariko n’abanywa nke bakaba bakwiye kubigirira amakenga. Muri kanseri zishobora guterwa n’inzoga, harimo iy’umunwa, iy’ibihaha, iy’ibere, iyibasira igice cy’amara, umuhogo n’ibindi bice by’urwungano ngogozi.

Uyu mushakashatsi Jennie Connor avuga ko akurikije ibyavuye mu bushakashatsi, asanga nta rugero rw’inzoga umuntu yanywa ngo abe yirinze ijana ku rundi kurwara izi kanseri zishobora guterwa n’inzoga, keraka mu gihe uwo bishobokeye yazihagarika burundu.

N’ubwo ubu bushakashatsi bugaragaza ibibi by’inzoga ku mubiri w’umuntu, hari ubundi bwagiye bukorwa bwerekana ibyiza ntagereranywa nko kuba divayi itukura (Red Wine) ifasha umutima gukora neza kandi kunywa mu rugero bikaba bishobora kurinda umuntu uburwayi bw’umutima ku kigero cya 25%.

KANDA HANO UREBE VIDEOS UTASANGA AHANDI