Polisi y’u Burundi yataye muri yombi abarenga 200 basabirizaga i Bujumbura

Chief Editor | 29-06-2016
Polisi y’u Burundi yataye muri yombi abarenga 200 basabirizaga i Bujumbura

Abantu barenga 200 basabirizaga hagati mu mujyi wa Bujumbura, batawe muri yombi na Polisi y’u Burundi kuri uyu wa Gatatu, Polisi ikaba yabafashe ibisabwe n’ubuyobozi bw’uyu mujyi.

BBC dukesha iyi nkuru, ivuga ko abatawe muri yombi biganjemo urubyiruko n’abana bakiri bato cyane bajyanwa na ba nyina muri uyu mujyi ngo basabirize abahisi n’abagenzi, hakaba kandi harimo n’abantu bakuze barimo n’abafite ubumuga.

BBC ariko ivuga ko mu batawe muri yombi, harimo n’abakozi bo mu ngo n’abandi bakora akazi ko mu ngeri zitandukanye kimwe n’abageze mu za bukuru baguye mu gikundi cy’abafashwe kandi bo batasabirizaga.

Abapolisi babafataga, bahitaga baburiza imodoka z’igipolisi cyangwa amabisi (bus) yari yatanzwe n’ubuyobozi bw’umujyi wa Bujumbura. Bivugwa ko bajyanywe ahantu bagomba kubazwa hakarebwa imyirondoro y’aho bavuye bagasubizwayo.

Jacques Nshimirimana uyoboye urugaga rw’amashyirahamwe aharanira uburenganzira bw’abana mu Burundi (FENADEB), avuga ko iyco gikorwa cyari gikenewe kuko ’’hari abantu bari basigaye baradukanye ingeso yo gukoresha abana bakiri bato cyane mu gusabiriza.’’

Nshimirimana avuga ko bizoroha gufasha bene abo bantu ’’umuntu azi aho abasanga, azi n’ingorane bafite kuko bose batazanwa mu mujyi n’impamvu zimwe’’.

Umuyobozi w’umujyi wa Bujumbura, Freddy Mbonimpa, avuga ko agiye kubagezaho ubutumwa bwo kubumvisha ko bakwiye gushakisha ubuzima mu bundi buryo butari ubwo gusabiriza.

KANDA HANO UREBE VIDEOS UTASANGA AHANDI