Ubuzima bw’abantu basaga 50 buri mu kaga nyuma yo kurya ubugari bikekwa ko buroze

Bikorimana Alexis | 17-08-2016
Ubuzima bw’abantu basaga 50 buri mu kaga nyuma yo kurya ubugari bikekwa ko buroze

Abantu basaga 50 ubu bari mu bitaro nyuma y’uko bariye ubugari bwaritswe mu myumbati iroze, ubu abenshi mu bajyanywe mu bitaro bakaba bagaragaza umuriro udasanzwe, kuruka ndetse no gucika intege.

Abaturage basaga 50 bo mu karere ka Kibuku, ubu ubuzima bwabo buri mu kaga nyuma yo kurya ubugari bw’imyumbati bikekwa ko ifu bakoresheje yari yarozwe. Aba bahuye n’iki kibazo bakaba bahise bajyanwa mu bitaro bya Kasasila, muri kigo nderabuzima cya Kibuku ndetse no mu bitaro bikuru bya Pallisa ngo barebe koko niba ari uburozi cyangwa ari ikindi cyorezo cyateye.

Mu bagizweho ingaruka n’ubugari bw’iyo myumbati harimo abana ndetse n’abantu bakuru batuye Kasasila, Nakondo ndetse no mu gace ka Kapyani. John Batonghana, uhagarariye ubwoko bwagizweho ingaruka n’ubu bugari, yavuze ko baguze imyumbati ku isoko nyuma bakayijyana ku cyuma gisya bakazana ifu bisanzwe, nyuma bakarikamo ubugari, bikaba bikekwa ko iyo fu yaba yararozwe.

Yakomeje atangariza The Monitor dukesha iyi nkuru ko bishoboka ko ari imyumbati yari iroze dore ko n’abandi bayiguzeho baturuka mu bundi bwoko nabo bari mu bitaro byo mu duce baherereyemo.

Umwe mu bagezweho n’ingaruka z’iyi myumbati, Jane Kajenbe, arasaba igipolisi gukora iperereza ryimbitse bakareba ikihishe inyuma y’iyi myumbati dore ko uwariye ku bugari bwayo wese ubu arwaye.

Ubuyobozi bwatangaje ko bwamaze gufata imwe mu myumbati bakeka ko irimo uburozi, bakayijyana muri raboratwari ndetse bakoherezayo n’impuguke ngo barebe niba iyo myumbati yujuje ubuziranenge, ubu hakaba hari no gushakishwa imyirondoro y’abagize uruhare mu kugurisha iyo myumbati.

KANDA HANO UREBE VIDEOS UTASANGA AHANDI