Uganda: Abagabo babiri baguranye abagore nyuma y’uko buri umwe yifuzaga umugore w’undi

Chief Editor | 14-06-2016
Uganda: Abagabo babiri baguranye abagore nyuma y’uko buri umwe yifuzaga umugore w’undi

Mu mpera z’icyumweru gishize, mu gace kitwa Busati ho mu karere ka Sironko mu gihugu cya Uganda, habaye umuhango udasanzwe w’abagabo babiri b’inshuti baguranye abagore, nyuma y’igihe kirekire buri umwe yifuza umugore w’undi.

Ibi byabaye kuwa Gatandatu tariki 11 Kamena 2016, ubwo umugabo witwa Steven Wesonga n’inshuti ye magara David Woisi bari basanzwe banakorana mu kazi kabo ka buri munsi, bafashe icyemezo cyo kugurana abagore mu ruhame. Aba bagabo bombi, ngo buri umwe yari amaze igihe kirekire yifuza umugore w’undi nk’uko ikinyamakuru Daily Minitor dukesha iyi nkuru kibishimangira.

Muri uyu muhango wakozwe mu ruhame abaturage babyirebera, Steven yafashe Sarah Muduwa wari usanzwe ari umugore wa David, hanyuma uyu nawe afata Annette Namataka wari usanzwe ari umugore wa Steven.

Steven Wesonga yari amaze kubyarana n’uyu mugore we abana batanu, mu gihe David Woisi we yari afite abana babiri yabyaranye n’uyu mugore we. Aba bagabo bombi, batangarije Daily Monitor ko bishimiye cyane kuba ibyifuzo byabo bisubijwe.

Rose Manyanya, umujyanama w’abagore bo muri Busati, yatangaje ko aba bagabo bafashe icyemezo cyiza, bakiyemeza gukurikira ibyifuzo byabo aho kwiyoberanya. Yagize ati: "Babyemeranyijweho nk’inshuti, natwe dushyigikiye icyemezo cyabo."

KANDA HANO UREBE VIDEOS UTASANGA AHANDI