Uganda: Bikoreye umuti mu byatsi ushobora kuvura malariya mu minsi 3

Chief Editor | 21-06-2016
Uganda: Bikoreye umuti mu byatsi ushobora kuvura malariya mu minsi 3

Abahanga mu bya siyansi mu gihugu cya Uganda, babashije gukora umuti wa Malariya bakoresheje ibyatsi karemano, uyu muti ukaba ushobora kuvura burundu iyi ndwara mu gihe cy’iminsi itatu gusa.

Nk’uko ikinyamakuru Daily Monitor cyo muri iki gihugu cyabitangaje, Dr Patrick Ogwang uri mu basuzumye ubu bushakashatsi, akaba ari inzobere mu by’imiti ndetse ari n’umwarimu muri Kaminuza ya Mbarara, yemeje ko uyu muti wa Malariya nta kibazo wateza uwunyweye kandi ukaba ubasha gukiza neza indwara ya malariya mu gihe gito.

Yagize ati: "Udukoko dutera malariya twakuwe mu barwayi bari mu bitaro bya Mulago, twashyizwe mu muti muri laboratwari, bigaragara ko twishwe n’uwo muti. Umuti wanageragerejwe ku mbeba, wica udukoko twa malariya kandi ntiwagira icyo wangiza ku bice by’umubiri nk’umwijima, impyiko n’imisokoro."

Dr Patrick Ogwang avuga ko aho gukoresha imiti yari isanzwe ikoreshwa mu kuvura iyi ndwara, hakoreshwa iyi yaboneka mu buryo buhendutse kandi ikagira uruhare mu kurandura burundu indwara ya Malariya ku mugabane wa Afurika.

Ibyavuye mu bushakashatsi byashyikirijwe ikigo cy’igihugu gishinzwe iby’imiti muri Uganda, kugirango zikemeze ko iyi mito yajya ku isoko igatangira gukoreshwa, aho yasohoka mu buryo bw’ibinini ku bakuru no mu buryo bw’ibisukika ku bana.

KANDA HANO UREBE VIDEOS UTASANGA AHANDI