Umugabo yafashwe asambanyiriza umukecuru w’imyaka 79 mu irimbi

Paola Abizera | 28-07-2016
Umugabo yafashwe asambanyiriza umukecuru w’imyaka 79 mu irimbi

Impunzi ikomoka mu gihugu cya Eritereya, ku Cyumweru yafatiwe mu Budage ishinjwa gufata ku ngufu umukecuru w’imyaka 79 imufatiye mu irimbi ryo mu mujyi wa Ibbenbueren, mu Burengerazuba bw’intara ya Westphalia, aho uwo mukecuru yari yagiye gusura igituro cya murumuna we.

Uyu mugabo w’imyaka 40 y’amavuko aba mu Budage kuva mu mwaka wa 2013, akaba yabaga mu nzu icumbikirwamo abimukira iri hafi y’aho iri rimbi riri. Umuntu witambukiraga niwe wahamagaye Polisi nyuma yo kumva umugore ataka asaba ubutabazi mu ma saa kumi n’ebyiri za mu gitondo.

Polisi yatabaye bwangu ibasha gufata uyu mugabo. Uwahohotewe yajyanywe mu bitaro aravurwa ndetse aranasezererwa ava mu bitaro kuwa kabiri.

Ibyaha biramutse bihamye uyu mugabo, ashobora gukatirwa gufungwa imyaka 15. Mu ntangiriro z’uku kwezi, inteko nshinga amategeko y’u Budage yashyizeho itegeko ryongera ubusobanuro bw’ibyaha bifatwa nk’ihohoterwa rishingiye ku gitsina bituma byoroha cyane gusubiza iwabo abimukira babifatiwemo.

Ibi byaje bikurikira ibikorwa by’ihohoterwa byabereye mu kivunge cy’abantu mu burengerazuba bwa Cologne ku munsi w’ubunani ndetse binatewe n’imyaka myinshi y’ibiganiro mpaka mu kugira amategeko akaze ahana ihohoterwa rishingiye kugitsina.

Hari ubwumvikane bwa bose mu gihe iri ritegeko ryatorwaga mu nteko. Abadepite bose uko ari 601 batoye bashyigikiye itegeko rishya nyuma y’ibiganiro byerekanye amarangamutima menshi.

Iri tegeko rishya ryabatijwe “Oya bivuga Oya” n’ibitangazamakuru, ntabwo risaba ko uwahohotewe agerageza kwirwanaho kugirango byitwe gufata ku ngufu nk’iryo ryasimbuye. Iri tegeko kandi ryoroshya uburyo bwo gusubiza abimukira iwabo igihe bafashwe bakoze ibi byaha, ndetse ryanongereye ibindi bikorwa bitandukanye mu busobanuro bw’ibyaha bishobora guhanirwa harimo gukorakora umukobwa atabiguhereye uburenganzira.

KANDA HANO UREBE VIDEOS UTASANGA AHANDI