Umugore yaciwe ibiganza anatemagurwa mu mutwe n’umugabo we amuziza kutabyara

Chief Editor | 1-08-2016
Umugore yaciwe ibiganza anatemagurwa mu mutwe n’umugabo we amuziza kutabyara

Umugore w’imyaka 27 y’amavuko witwa Jackline Mwende wo mu gace ka Masii muri Kenya, yaciwe ibiganza byombi anatemagurwa mu mutwe n’umugabo we bamaze imyaka 7 bashakanye, amuziza kuba muri iyo myaka yose yarabuze urubyaro.

Jackline Mwende yabwiye ikinyamakuru Daily Nation, ko tariki 24 Nyakanga 2016 ari bwo umugabo we witwa Stephen Ngila Thenge w’imyaka 34 yamutemye amaboko yombi ibiganza akabikuraho akoresheje umuhoro, hanyuma akanamutera ibindi bikomere mu mutwe, nta n’ikosa rindi yakoze uretse kuba amaze imyaka 7 atarabasha gusama ngo babyarane umwana.

JPEG - 47.8 kb

Jackline Mwende avuga ko umugabo we yamutemye n’ubundi bamaze amezi abarirwa muri atatu batakibana, kuko n’ubundi yamutotezaga amuziza kuba atabyara. Gusa avuga ko atiyumvisha impamvu umugabo we yamukoreye ubu bugome, nyamara bari baragiye kwa muganga bakamubwira ko ari we ufite ikibazo.

JPEG - 67.9 kb

Yagize ati: "Ntabwo nshobora kumva ukuntu ari njye arenganya, kandi twari twaragiye kwa muganga umwaka ushize, abaganga bakavuga ko ari we ufite ikibazo, ariko nabwo bari bamwijeje ko gishobora gukira."

JPEG - 71.5 kb

Uyu mugore wavuye mu bitaro kuwa Gatanu w’iki cyumweru gishize aho yavurwaga ibikomere ariko ibiganza by’amaboko yombi byo bikaba byaraciwe burundu n’umugabo we, avuga ko umugabo yari yarataye urugo akagaruka nyuma y’amezi atatu ari nabwo yamutemaguraga.

Yagize ati: "Yari yarataye urugo mu mezi atatu ashize, aza kuza ari ku Cyumweru tariki 24 z’ukwezi kwa Karindwi ahagana saa mbiri n’igice z’ijoro. Namaze kumufungurira urugi, arambwira ngo uyu munsi niwo munsi wawe wa nyuma, ubwo ahita atangira kuntemagura n’umupanga."

Jackline Mwende akomeza avuga ko yahise asakuza atabaza abaturanyi, umugabo yakumva baje agahita atoroka agacika. Bamujyanye ku bitaro by’ahitwa Machakos atangira kuvurwa, avayo kuwa Gatanu tariki 29 Nyakanga 2016, ariko akazakomeza kwivuza ari mu rugo.

Abaturanyi bavuga ko uyu muryango wahoraga mu matiku n’intonganya ndetse umugore akaba yarashatse gutandukana nawe kera, ariko akabibuzwa na Pasiteri wabo wamubwiye ko agomba kwihangana ntasenye.

Stephen Ngila Thenge yatawe muri yombi tariki 25 Nyakanga 2016, afatirwa mu mujyi wa Machakos aho yari yahungiye. Jackline Mwende we ubu arimo kwitabwaho n’ababyeyi be, kandi bavuga ko uko bizagenda kose umukwe wabo agomba guhanwa by’intangarugero.

Abaharanira uburenganzira bw’abagore muri Kenya nabo bavuga ko ubutabera bugomba gukora neza akazi kabwo, uyu Stephen Ngila Thenge watemye umugore we akabihanirwa by’intangarugero kugirango n’abandi batekerezaga gukora nk’ibyo yakoze bahite babizinutswa.

KANDA HANO UREBE VIDEOS UTASANGA AHANDI