Umukobwa wa Perezida Obama yatangiye akazi ko gukora muri Resitora

Bikorimana Alexis | 6-08-2016
Umukobwa wa Perezida Obama yatangiye akazi ko gukora muri Resitora

Sasha Obama, umukobwa wa Perezida Barack Obama wa Leta Zunze Ubumwe za Amerika, ubu arimo gukora muri resitora (Restaurant) yo muri Leta ya Massachusetts, ahantu umuryango wa Obama ukunda kujya kuruhukira mu gihe cy’impeshyi.

Nk’uko ibinyamakuru byo muri Amerika byabitangaje, uyu mukobwa ubu yabonye akazi ko kujya atanga ibyo kurya muri resitora ya Martha’s Vineyard. Ikinyamakuru The Boston Herald dukesha iyi nkuru cyavuze ko uyu Sasha w’imyaka 15 wemeye no gukoresha izina rye rya Natasha mu kazi, yagiye kuri iyi restaurant rwihishwa aherekejwe n’abamurinda batandatu.

Uyu mukobwa muto w’umukuru wa Leta Zunze Ubumwe za Amerika yagaragaye yambaye impuzankano y’ishati ifite ibara ry’ubururu ndetse n’ingofero biranga iyi restaurant agiye gukoramo.

Umwe mu bakorana bya hafi n’uyu mukobwa yabwiye The Herald ati: "Uyu mukobwa arimo gukorera mu igorofa ryo hasi aho yakira abagura ibyo kurya bataha”

N’ubwo uyu mukobwa afite akazi ko kwakira abagura ibyo kurya bataha, hiyongeraho gutunganya restaurant ndetse no gusukura ameza.

Aya makuru n’ubwo yatangajwe ndetse agasakara ku isi hose binyuze mu binyamakuru, ibiro by’umukuru w’igihugu, The White House ntacyo byigeze bivuga kuri aya makuru. Gusa n’ubwo hari abatungurwa no kumva umwana w’umukuru w’igihugu akora muri restaurant, si ko umugore wa Obama Madamu Michelle Obama abibona dore ko we yifuza kurera abana be b’abakobwa mu buzima busanzwe nk’uko yagiye abigarukaho mu bihe bitandukanye.

KANDA HANO UREBE VIDEOS UTASANGA AHANDI