Undi musore yahanutse mu igorofa mu mujyi wa Kampala

Rukundo Irené | 23-09-2016
Undi musore yahanutse mu igorofa mu mujyi wa Kampala

Mu gihe hari hashize igihe gito umusore uzwi ku izina rya Mustapha yiyahuye aturutse mu bushorishori bw’igorofa rya Mabirizi riherereye mu mujyi wa Kampala, kuri uyu wa Kane undi musore yahanutse ku igorofa naryo riri muri uyu mujyi rizwi nka Garden City maze yikubita hejuru y’imodoka yari iparitse munsi y’iyi nyubako ariko k’ubw’amahirwe ntiyahita apfa.

Uyu musore utaramenyekana amazina ye ndetse n’imyirondoro, ariko bikaba bikekwa ko ari hagati y’imyaka 25 na 30 yaje gutungura abantu ubwo babonaga aturutse hejuru y’iyi nzu maze akagwa hasi akangiza imodoka y’umuntu wari wayiparitse munsi y’iyo nyubako. Yajyanywe mu bitaro nyuma yo kigira ibikomere bidasanzwe kandi byagaragaraga ko ashobora no gupfa.

Umuvugizi wa Polisi mu mujyi wa Kampala, Emirian Kayima, ubwo yaganiraga na Daily Monitor dukesha aya makuru, yavuze ko uyu musore bataramenya iwabo kandi ko yangiritse bikomeye ariko ngo akimara kugwa hasi yahise ajyanwa mu bitaro byitwa Mulago biri muri Kampala.

Yagize ati: "Turamukeneye cyane, n’ubwo yangiritse cyane ariko nyuma namara koroherwa tuzamujyana mu rukiko ashinjwa icyaha cyo kwiyahura”.

Uyu musore kimwe na mugenzi we Mustapha uherutse nawe kuva mu bitaro nyuma yo guhanuka hejuru y’igorofa ntapfe, bombi bakaba bazajyanwa mu nkiko bashinjwa ibyaha byo kugerageza kwiyahura.

KANDA HANO UREBE VIDEOS UTASANGA AHANDI