Yagiye yizezwa akazi keza, yisanga asambana ku ngufu n’abagabo barenga 10 ku munsi

Rukundo Irené | 6-08-2016
Yagiye yizezwa akazi keza, yisanga asambana ku ngufu n’abagabo barenga 10 ku munsi

Rama w’ imyaka 24 ukomoka mu gihugu cya Siriya, yahindutse umucakara w’imibonano mpuzabitsina ubwo yajyanwaga muri Lebanon asezeranyijwe ko agiye kujya ahembwa Amapawundi agera kuri 700. Akigerayo yatangiye kubona ibitandukanye n’ibyo yifuzaga kuko yakoreshwaga imibonanompuzabitsina inshuro zirenga icumi ku munsi ku ngufu, ndetse akanakubitwa bihambaye.

Ni kenshi abakobwa bajyanwa n’abantu babasezeranya ko bagiye kubona akazi, nyamara bagasanga bajyanywe mu ndiri y’uruhuri rw’ibibazo. Akigezwa muri Lebanon, Rama bamujyanye mu nzu ikorerwamo ubusambanyi, asanga harimo abandi bagore benshi nabo baba bazanywe muri ibyo bikorwa byo kuryamana n’abagabo ku gahato.

Aho hantu yari afungiwe ntabwo bari bemerewe gusohoka kandi bahoraga bakubitwa, iyo bakoraga imibonano idakingiye bajyanwaga ku ngufu bakabaha imiti ituma inda zivamo birinda ko babyarira aho. Si we wenyine, n’abandi bagore bari bafungiwe hamwe bategekwagwa kuryamana n’abagabo barenga 10 ku munsi, mu minsi y’ikiruhuko (weekend) umubare washoboraga kuzamuka ukikuba kabiri.

Rama na bagenzi be batanu baje kwirwanaho ubwo bakubitaga umugore wabarindaga, basohoka biruka banyuze mu muryango w’inyuma w’inzu barimo. Umuryango mpuzamahanga uharanira uburenganzira bw’ikiremwamuntu (Human Rights Watch) ugaragaza ko ishimutwa ry’abana bato b’abangavu ryahise rigabanyuka muri Lebanon, kuko nyuma yo kumenya ayo makuru hari abagore bagera kuri 75 b’abanyasiriya bararokowe bavanwa aho hantu.

Uyu utaravuze izina rye nyakuri ku bw’umutekano we ariko hakaba harakoreshejwe izina Rama, akomeza avuga ko ibyo yagiye abonera muri Lebanon mu nzu abo ba rushimusi bakoreragamo yitwaga Cher Maurice brothel, yayoborwaga na Imad al-Rihawi byari agahomamunwa.

Rama aganira n’ikinyamakuru The guardian yagize ati:”Twari abacakara, kuko iyo twakubitwaga natakaga mvuga nti Mana dukize, uwabaga arimo kunkubita by’agashinyaguro yarambwiraga ngo ‘ wa ndaya we, ukeka ko Imana iza kugukiza? Byatumaga arushaho kunkubita. Ntabwo twavugaga ijambo Allah, yewe ntitwari twemerewe no kuritekereza mu mutima”.

Ngo nubwo Rama yagize amahirwe akahava ntabwo yumva yifuza kuganiriza iyi nkuru abavandimwe be.

Dr Katharine Jones wo muri Coventry University, avuga ko Lebanon igaragaramo ihohoterwa ry’abana aho bamwe bashyingirwa bakiri bato. Akomeza avuga ko abangavu basiga iwabo bikarangira bisanze bakoreshwa ubusambanyi ku ngufu.

Mu bushakashatsi bwe, Kathrine akomeza avuga ko impunzi ziva muri Sriya akenshi zijya mu busambanyi kugirango zibone udufaranga tw’intica ntikize mu buryo bwo kwishyura inzu, ibiryo n’ibindi bikenerwa byoroheje bya buri munsi.

KANDA HANO UREBE VIDEOS UTASANGA AHANDI