Papa Francis yagiranye ibihe bidasanzwe n’abakobwa 20 bahoze ari indaya

Chief Editor | 13-08-2016
Papa Francis yagiranye ibihe bidasanzwe n’abakobwa 20 bahoze ari indaya

Aha Papa Francis yahoberaga umwe muri aba bakobwa bahoze mu buraya

Kuri uyu wa Gatanu tariki 12 Kanama 2016, umushumba wa Kiliziya Gaturika ku isi yatunguye abagore n’abakobwa 20 bahoze ari indaya abasura mu nzu babamo ndetse baraganira barishima bagirana ibihe by’agahebuzo, byongera gushimangira ukwicisha bugufi k’uyu mushumba w’imyaka 79 y’amavuko.

Papa Francis, buri wa Gatanu asigaye agira gahunda yitwa "Uwa Gatanu w’impuhwe" aho yegera kandi akereka urugwiro n’urukundo abantu baba babayeho mu buzima bubakomereye aho usanga benshi batabikoza.

Aba bakobwa bamaze umwanya baganira n’umushumba wa Kiliziya Gaturika ku isi yose

Kuri uyu wa Gatanu rero, yasuye abakobwa bahoze ari indaya bagera kuri 20 batujwe mu nyubako yo mu mujyi wa Roma nyuma yo kuva muri uwo mwuga wo kwicuruza, iyi nyubako babamo nayo bakaba barayihawe na Kiliziya gaturika ari nayo ibafasha mu buzima bwa buri munsi.

Aba bakobwa barimo n’ababyaye, barimo bane bakomoka muri Albania, barindwi bakomoka muri Nigeria, batandatu bakomoka muri Romania hamwe n’abandi barimo ukomoka mu Butaliyani, muri Tunisia n’undi wo muri Ukraine.

Aha Papa Francis yasomaga umwana w’umwe muri aba bakobwa bahoze ari indaya.

Aba bakobwa bose bafite imyaka ibarirwa muri 30, bamaze igihe kirenga isaha baganira na Papa Francis, bamubwira iby’inkuru z’ubuzima babayeho ari imbata z’ubusambanyi, nawe abatega amatwi kandi arabahumuriza, igihe kiza no kugera abereka urugwiro n’urukundo abafitiye barishimana bagirana ibihe byiza.

Aha Papa Francis yarebanaga amaso ku yandi n’umwe muri abo bakobwa

KANDA HANO UREBE VIDEOS UTASANGA AHANDI