Barack Obama, Hillary Clinton na Donald Trump barahanganisha ikinyoma no gusebanya

Chief Editor | 10-06-2016
Barack Obama, Hillary Clinton na Donald Trump barahanganisha ikinyoma no gusebanya

Birasanzwe ko benshi mu banyapolitiki hirya no hino ku isi bahindura indimi bitewe n’inyungu bafite, rimwe na rimwe ugasanga umunyapolitiki ahanganye n’uwo yari ashyigikiye cyangwa uwari umushyigikiye. Ibi nibyo biri hagati ya Perezida Obama, Hillary Clinton na Donald Trump.

Kugeza ubu Donald Trump na Hillary Clinton nibo barimo guhanganira umwanya wo kuyobora Leta Zunze Ubumwe za Amerika, umwe muri bo agasimbura Barack Obama mu matora azaba mu kwezi k’Ugushyingo uyu mwaka. Hagati aho ariko Obama, Clinton na Trump, ibyo bavuga ubu, bihabanye n’ibyo bavugaga mu myaka ishize.

Mu mwaka wa 2008, Barack Obama wiyamamarizaga kuyobora manda ye ya mbere, yabwiye Abanyamerika ko badakwiye kwizera na gato Hillary Clinton, kuko ngo ibyo avuga byose ari byinshi ariko akaba abeshya nta na kimwe azigera akora kuko atari umunyakuri.

Mu mwaka wa 2012, Donald Trump yashimagije cyane Hillary Clinton, avuga ko ari umukozi ukora cyane kandi akaba ari umunyabwenge utangaje, icyo gihe akaba yaramushimiye akazi keza yakoraga nk’umunyamabanga wa Leta.

Kuri ubu, Perezida Barack Obama uzarangiza manda yemererwa mu mpera z’uyu mwaka, yatangaje ko ashyigikiye cyane Hillary Clinton. Kuri uyu wa Kane, yamusingije agira ati: "Nabonye uburyo yumva ibintu, ndeba uburyo ashyira mu bikorwa icyo yiyemeje kandi akaba ari umunyembaraga, ngomba kumushyigikira. Nzi uburyo aka kazi gakomeye, niyo mpamvu mbona ko Hillary Clinton yagakora neza."

Ku rundi ruhande, Donald Trump uhanganye na Hillary Clinton, nawe nyuma y’uko yamusingizaga muri 2012, ubu aramwita umunyamanyanga utavugisha ukuri kandi uhuzagurika. Abinyujije kuri Twitter, kuri uyu wa Kane yagize ati: "Inkundamugayo Hillary Clinton, yaba ari ikibazo ku bijyanye n’itangwa ry’imirimo, ku bukungu, ku bucuruzi, ku buvuzi, ku gisirikare, ku ntwaro no ku bindi byose. Yaba ari hanyuma ya Obama."

Buri wese arakurura yishyira kandi aravuga ibijyanye n’inyungu ze, nk’uko byari bimeze mu myaka yashize ubwo bavugaga ibitandukanye n’ibi ariko nabwo bafite izindi nyungu bari bagamije kugeraho.

KANDA HANO UREBE VIDEOS UTASANGA AHANDI