Donald Trump yandikiwe n’abo mu ishyaka rye ibaruwa irimo amagambo akarishye

Bikorimana Alexis | 9-08-2016
Donald Trump yandikiwe n’abo mu ishyaka rye ibaruwa irimo amagambo akarishye

Aba ‘Republican’ bagera kuri 50 banditse ibaruwa yemeza ko Trump nta bitekerezo bihamye ndetse n’ubushobozi bwo guhagararira ishyaka ryabo mu matora y’umukuru w’igihugu.

Aba bishyize hamwe bakandikira Trump, abenshi ni abigeze kuba abayobozi bakomeye muri Leta Zunze Ubumwe za Amerika, barimo uwahoze ari umuyobozi w’akanama gashinzwe ubutasi bwa Amerika (CIA) wavuze ko Donald Trump nta ndangagaciro n’ubunararibonye byatuma ayobora igihugu cy’igihangange nka Leta Zunze Ubumwe za Amerika.

Iyi baruwa nk’uko BBC ibitangaza, ivuga ko Trump agaragaza ko nta kintu aha agaciro mu bijyanye no guhesha igihugu ubusugire n’ubudahangarwa kandi kibisanganywe imbere y’amahanga.

Bakomeje bagaragaza ko uyu mukandida uhagarariye iri shyaka ry’aba Republican nta bwenge bw’ibanze afite ku bijyanye no kumenya akamaro ndetse n’umwihariko w’inzego, amategeko, amadini ndetse n’ukwishyira ukizana kw’ibitangazamakuru muri iki gihugu.

Trump we avuga ko abanditse iyi baruwa ari bamwe mu batsinzwe mu miyoborere ya Amerika none bakaba bashaka kubona isi yose ihinduka umwanda.

Iyi baruwa ije nyuma y’uko uyu mugabo asabye igihugu cy’u Burusiya nka kimwe mu bihugu bitajya imbizi na Leta Zunze Ubumwe za Amerika, kwinjira mu mabanga y’umukandida bahanganye Hillary Clinton.

Mu bantu bakomeye bashyize umukono kuri iyi baruwa twavuga nka John Negroponte wahoze ahagarariye akanama k’ubutasi bwa Amerika, Robert Zoellick wahoze ari umunyamabanga wa Leta, Tom Ridge ndetse na Micheal Chertoff.

Uyu mukandida yaranzwe ahanini no kuvuga amagambo akarishye, nk’aho yasabiraga bamwe mu ba perezida gufungwa. Donald Trump kandi yagayiwe na benshi kutubaha umuryango w’umwe mu ngabo za Amerika waguye ku rugamba no kugaragaza ko adashobora kumvikana n’idini rya Islam.

KANDA HANO UREBE VIDEOS UTASANGA AHANDI