Gabon: Abaturage bamagana Perezida usanzweho batwitse Inteko Ishinga Amategeko

Chief Editor | 1-09-2016
Gabon: Abaturage bamagana Perezida usanzweho batwitse Inteko Ishinga Amategeko

Nyuma y’uko komisiyo y’amatora muri Gabon itangaje ko Ali Bongo Ondimba usanzwe ayobora iki gihugu ari we n’ubundi watsinze amatora akarusha Jean Ping bari bahanganye amajwi akabakaba 5000, hari abaturage bahise bamagana ibyavuye mu matora, bishora mu mihanda mu mujyi wa Libreville barigaragambya, bakaba banatwitse ibiro by’Inteko Ishinga Amategeko y’iki gihugu muri iri joro.

Hakimara gutangazwa ibyavuye mu matora, abashyigikiye Jean Ping ntibigeze bemera na gato ko habayeho umucyo mu ibarura ry’amajwi ndetse bahise batangira kwigaragambya kuko imibare y’agateganyo yagaragazaga ko Ali Bongo Ondimba yagize amajwi angana na 49,8% naho Jean Ping bari bahanganye akagira 48,23%.

Mu byangijwe n’abigaragambya, harimo ibiro by’Inteko Ishinga Amategeko byatwitswe ariko mbere yayo bakaba babanje gutwika imodoka zose zari ziri hanze yayo, ijoro ryose iyi nyubako ikaba yari irimo gushya. Kugeza ubu kandi, bivugwa ko abantu babiri bamaze kugwa mu myigaragambyo naho abandi benshi bakaba bakomeretse.

JPEG - 14 kb

Ali Bongo Ondimba w’imyaka 57 y’amavuko, yagiye ku butegetsi asimbuye umubyeyi we Omar Bongo wari umaze gupfa muri 2009, mbere ariko akaba yari afite indi myanya ikomeye ku gihe cy’ubutegetsi bwa se, kuko kuva muri 1989 kugeza mu 1991 yari Minisitiri w’Ububanyi n’amahanga, kuva 1991 kugeza mu 1999 yari umudepite naho kuva 1999 kugeza muri 2009 ubwo yiyamamarizaga gusimbura se, yari Minisitiri w’Ingabo.

JPEG - 76.9 kb

Ali Bongo Ondimba usanzwe ku butegetsi, byatangajwe ko ari we watsinze amatora

Gabon ni igihugu kidasanzwe muri Afurika, kuko gifite abaturage bacye kandi kikagira ubuso bunini cyane. Ugereranyije n’u Rwanda, Gabon ifite ubuso bwa kilometerokare 267,667 butuyeho abaturage babarirwa muri 1.672.000 dushingiye ku ibarura ryakozwe iwabo muri 2013, naho u Rwanda rufite ubuso bwa kilometerokare 26,338 butuyeho abaturage babarirwa muri 11.780.000 dushingiye ku ibarura rusange rya 2013.

KANDA HANO UREBE VIDEOS UTASANGA AHANDI