Hagaragajwe raporo yerekana ko mu Burundi haba hagiye kuba Jenoside

Chief Editor | 14-08-2016
Hagaragajwe raporo yerekana ko mu Burundi haba hagiye kuba Jenoside

Komite y’Umuryango w’Abibumbye ishinzwe kurwanya itotezwa ry’ikiremwamuntu, ivuga ko ibikorwa by’urwango n’ihohoterwa biri mu Burundi byibasira abo mu bwoko bw’abatutsi, biganisha ku kuba iki gihugu gishobora kubamo Jenoside. Ibi ni ibyavuye muri raporo igaragaza inyigo yakozwe ku itotezwa riri mu Burundi.

Iyi Komite y’Umuryango w’Abibumbye ishinzwe kurwanya itotezwa, yakoze inyigo mu gihe kingana n’ibyumweru bitatu yiga ku ishyirwa mu bikorwa ry’amahame yo kurwanya ihohoterwa ry’uburenganzira bwa muntu ku bihugu nka Kuwait, Honduras na Mongolia, hanyuma hakorwa na raporo y’umwihariko ku Burundi.

Ukuriye iyi Komite, Jens Midvig, yabwiye Ijwi rya Amerika ko ibibazo by’itotezwa biri mu Burundi, bishingiye ahanini kuri politiki no ku moko. Avuga ko uburyo bikorwa, ari inzira igaragaza ko iki gihugu gishobora kuzakorwamo jenoside mu gihe kiri imbere.

Jens Midvig kandi avuga ko n’umujyanama wihariye wa Ban Ki Moon uyobora Umuryango w’Abibumbye, nawe yerekanye impungenge z’uko ihohoterwa n’itotezwa biri mu Burundi ari intambwe iganisha iki gihugu ku mahano ya Jenoside.

Ubwicanyi bukorwa n’insoresore zizwi nk’Imbonerakure, izimira ry’abantu mu buryo bw’amayobera, guhutazwa no kwamburwa ubuzima ku batavuga rumwe n’ubutegetsi akenshi bishingiye ku moko kandi ntibigire uwo bishinjwa ngo akurikiranwe n’ubutabera, umuryango w’abibumbye ubibona nk’ikimenyetso simusiga kiganisha u Burundi kuri Jenoside.

KANDA HANO UREBE VIDEOS UTASANGA AHANDI