Ibintu 5 bitangaje kuri Perezida wa Nigeria urimo guterana amagambo n’umugore we

Chief Editor | 17-10-2016
Ibintu 5 bitangaje kuri Perezida wa Nigeria urimo guterana amagambo n’umugore we

Guhera mu Cyumweru gishize, ibinyamakuru byinshi muri Afurika no ku isi yose byagarutse cyane ku guhangana no guterana amagambo hagati ya Perezida Muhammadu Buhari wa Nigeria n’umugore we Aisha Buhari, muri iyi nkuru tukaba tugaruka ku bintu 5 bitangaje kuri uyu mukuru w’igihugu.

Gutera amagambo bijya gutangira, Aisha Buhari yatangaje ko Guverinoma ya Nigeria yigaruriwe n’agatsiko k’abantu bacye bakora ibyo bishakiye Perezida ari nawe mugabo we arebera. Yavuze kandi ko abari muri Guverinoma ye nawe atabazi, atazi n’imikorere yabo.

Aisha Buhari ati: "Perezida ntazi n’abantu 45 muri 50 bahawe imyanya, nanjye simbazi kandi ndi umugore we tumaranye imyaka 27 yose... Bamwe mu bo yashyizeho baricara iwabo, bakagena abantu babo bazayobora ibigo n’indi myanya ikomeye muri za Minisiteri."

JPEG - 91.9 kb

Uyu mugore yabivuze umugabo we atari mu gihugu kuko yari mu ruzinduko mu Budage, maze aho yari ari ntiyaripfana nawe yibasira uwo bashakanye banafitanyenabana batanu. Muhammadu Buhari ati: "Sinzi ishyaka rya Politiki umugore wanjye abarizwamo, gusa abarizwa mu gikoni cy’iwanjye, akabarizwa mu cyumba cy’uburiri turaramo, ndetse hari n’ikindi cyumba kimwe abarizwamo."

Kubona Perezida wa Repubulika aterana amagambo n’umugore we mu binyamakuru ubwabyo biratangaje, ndetse kuri bamwe bashobora kumva bigayitse. Kuva yaba Perezida ariko na mbere yaho, Muhammadu Buhari asanzwe afite ibintu bitandukanye bigaragara nk’ibitangaje.

Kuwa Kabiri tariki 31 Werurwe 2015, nibwo komisiyo y’amatora muri Nigeria yatangaje uwatsinze amatora y’umukuru w’igihugu, uwo akaba ari Muhammadu Buhari wari uhanganye na Perezida wari ucyuye igihe Goodluck Jonathan. Kuva ubwo yahise atangira kuyobora abaturage ba Nigeria basaga miliyoni 178. Ibi nibyo ukwiye kumumenyaho:

1. Ni umusilamu ukomeye ku idini bihambaye, wigeze no kwifuza ko ryaba idini ry’itegeko ku banyagihugu

JPEG - 207.9 kb

Muhammadu Buhari yavutse tariki 17/12/1942, avukira ahitwa i Daura muri Leta ya Katsina iri mu majyaruguru ya Nigeria ku mupaka n’igihugu cya Tchad. Avuka mu muryango w’abana benshi, akaba ari bucura mu bana 23. Mu matora yatsinze umwaka ushize, yari umukandida w’ishyaka rya APC (All Nigeria People Party). Yashatse abagore inshuro ebyeri, akaba yarabyaye abana 10.

Ni umusilamu ukomeye ku idini cyane, dore ko mu mwaka wa 2011 yatangaje ko igihugu cya Nigeria kigomba kugendera ku mahame y’iri dini, ariko muri Mutarama 2015 ubwo yiteguraga kwiyamamaza, yaje kwisubiraho ashimangira ko amadini yose akwiye ubwisanzure, ndetse anibutsa abaturage ko ubwo yari Perezida kuva mu mwaka w’1983 kugeza mu 1985, atigeze abangamira uburenganzira bw’abaturage mu by’imyizerere yabo. N’ubu ntashimishwa no kuba igihugu cye kitagendera ku mahame ya Islam n’ubwo yanga kubuza abaturage ubwisanzure mu by’imyemerere.

2. Ni umusirikare ufite ubunararibonye cyane mu byo guhirika ubutegetsi

JPEG - 84.8 kb

Ku myaka 19 y’amavuko, Muhammadu Buhari yinjiye mu gisirikare ndetse aza kugenda ahabwa imyitozo ya gisirikare ikomeye mu gihugu cy’u Bwongereza, mu mwaka w’1980 aza guhabwa ipeti rya "General" mu gisirikare cya Nigeria. Ibi yabigezeho nyuma yo gufasha Murtala Muhammed kujya ku butegetsi mu mwaka w’1966 amaze guhirika (coup d’etat) uwitwa Aguiyi Ironsi wayoboraga Nigeria icyo gihe.

Nyuma yo kugirwa Jenerali (General), Muhammadu Buhari yaje kujya ku butegetsi mu mwaka w’1983 akuyeho Perezida Shehu Shagari wari watowe mu mwaka w’1979. Yayoboye iki gihugu kugeza mu mwaka w’1985 ubwo nawe yahirikwaga ku butegetsi na General Ibrahim Babangida. Yahiritse benshi, ariko nawe yakuweho bamuhiritse.

3. Ubwo yayoboraga Nigeria mbere, yatangaga ibihano bidasanzwe kandi bikarishye

JPEG - 22.9 kb

Igihe cy’amezi 20 Muhammadu Buhari yamaze ku butegetsi, cyasize abantu benshi bari muri gereza, harimo n’uwitwa Fela Kuti, uyu akaba ari uwahimbye injyana y’umuziki ukomoka muri Nigeria witwa "Afrobeat", iyi njyana ikaba kugeza ubu inakoreshwa mu Rwanda n’ahandi muri Afrika. Uyu munyamuziki kandi, yari impirimbanyi ikomeye yaharaniraga uburenganzira bwa muntu.

Uyu mugabo yahanaga yihanukiriye, kuburyo nk’uko ikinyamakuru Telegraph kibigaragaza, gukopera ikizamini ku munyeshuri wo muri Kaminuza byashoboraga kumuhesha igihano cyo gufungwa imyaka 20, naho abakozi ba Leta bashoboraga guhatwa ikiboko bagakubitwa bazira gukererwa akazi.

Mu mwaka w’1984 no mu 1985 ubwo mu Burengerazuba bwa Afrika hari hari inzara ikomeye, Buhari yirukanye abaturage ba Niger babaga mu gihugu cye, ibyo biza gutuma kugeza n’ubu iyo nzara yarabatijwe izina rijyanye n’iry’uyu muperezida, ihita yitwa "El-Buhari".

4. Ntajya acika intege, kuko yiyamamaje kenshi agatsindwa ariko akongera

JPEG - 1.6 Mb

Muhammadu Buhari wari watanzwe nk’umukandida w’ishyaka rya APC mu kwezi k’Ukuboza 2014 akaza gutsinda amatora yabaye umwaka ushize, ari mu bayobozi batacitse intege kuko yagiye agerageza kenshi kwiyamamaza ariko agatsindwa. Nyuma y’imyaka yari amaze atari muri Politiki, muri 2003 yagarutse kwiyamamariza kuyobora Nigeria ariko atsindwa na Olusegun Obasanjo. Muri 2007 nabwo ntiyacitse intege kuko yiyamamaje agatsindwa na Umaru Yar’Adua, hanyuma muri 2011 arongera agerageza amahirwe ye ariko atsindwa na Goodluck Jonathan ari nawe yabashije gusimbura muri 2015. Gutsindwa kwe muri 2011, byatumye habaho ubugizi bwa nabi bwahitanye abaturage ba Nigeria barenga igihumbi.

5. Urwango rwa Olusegun Obasanjo na Goodluck Jonathan nirwo rwatumye aba Perezida

JPEG - 62.9 kb

N’ubwo Muhammadu Buhari yari ahanganye bikomeye na Olusegun Obasanjo muri 2003 ubwo bahataniraga kuyobora Nigeria, bombi babaye abasirikare bakomeye ba Nigeria bo ku rwego rwo hejuru rwa General, kandi na mbere hose bigeze kugirana umubano mwiza bikomeye. Obasanjo wari warigeze kuyobora Nigeria na mbere yaho, mu mwaka w’1976 yigeze kugira Buhari Minisitiri w’ibikomoka kuri Peteroli n’umutungo kamere, Minisiteri ikomeye cyane muri Nigeria kuko ari nacyo gihugu cya mbere muri Afrika mu kugira peteroli nyinshi.

Goodluck Jonathan wahataniraga uyu mwanya na Buhari umwaka ushize, ntiyavugaga rumwe na Olusegun Obasanjo kuburyo n’abakunzi ba Olusegun Obasanjo barwanyaga bikomeye Goodluck Jonathan. Mbese muri macye hari inshuti n’abakunzi benshi ba Obasanjo, batangaje ko batatoye Buhari kuko bamukunda, ahubwo bamutoye kuko banga Goodluck Jonathan, ibi bikaba biri mu byafashije cyane Buhari kwigarurira imitima y’abaturage benshi mu matora yabaye umwaka ushize.

KANDA HANO UREBE VIDEOS UTASANGA AHANDI