Mu bakuru b’ibihugu batumiwe mu nama mu Rwanda, aba nibo b’abaherwe kurusha abandi

Chief Editor | 15-07-2016
Mu bakuru b’ibihugu batumiwe mu nama mu Rwanda, aba nibo b’abaherwe kurusha abandi

Umugabane wa Afrika, ni umugabane wa kabiri mu bunini ku isi, ukanaba umugabane wa kabiri utuwe n’abaturage benshi nyuma ya Aziya. Uyu mugabane ufatwa nk’ukennye kurusha indi, ufite ibihugu bisaga 54, muri ibyo ibigera kuri 47 bikaba biyoborwa n’abakuru b’ibihugu bamaze imyaka irenga 10 ku butegetsi. Bamwe mu bayobora ibi bihugu barakize cyane ndetse n’imiryango yabo ifite ubutunzi bwinshi hatitawe ku mibereho y’abanyagihugu.

Mu gihe mu Rwanda harimo kwakirirwa inama yatumiwemo abakuru b’ibihugu by’Afurika batandukanye, muri iyi nkuru, turabagezaho urutonde rw’abakuru b’ibihugu 8 byo muri Afurika, b’abaherwe bakize kurusha abandi bayobora ibihugu byabo kuri uyu mugabane. Aba tugiye kubagezaho bose bakaba bafite hejuru ya miliyoni 10 z’amadolari ya Leta Zunze Ubumwe za Amerika. Uru ni urutonde dukesha ikinyamakuru Richestlifestyle.

8) Robert Mugabe – $10.000.000

JPEG - 160.9 kb

Robert Mugabe umaze imyaka 29 ayobora igihugu cya Zimbabwe ukongeraho n’indi 7 yamaze akuriye Guverinoma ku mwanya wa Minisitiri w’intebe, n’ubwo igihugu cye gifite abaturage bakennye kandi babayeho nabi, ntibimubuza kuba umukuru w’igihugu ukize cyane. Abarirwa imitungo ya miliyoni 10 z’amadolari ya Leta Zunze Ubumwe za Amerika, ni ukuvuga arenga 7.800.000.000 uyabaze mu mafaranga y’u Rwanda.

7) Idriss Deby – $50.000.000

JPEG - 172.5 kb

Idriss Deby umaze imyaka 26 ayobora igihugu cya Chad, nawe ni umwe mu bakuru b’ibihugu b’abaherwe muri Afrika. Abarirwa akayabo ka miliyoni 50 z’amadolari ya Leta Zunze Ubumwe za Amerika, ni ukuvuga ko uyabaze mu mafaranga y’u Rwanda yarenga 39.000.000.000.

6) King Mswati III – $100.000.000

JPEG - 157.9 kb

Umwami Mswati III umaze imyaka 30 ayobora igihugu cya Swaziland, abarirwa akayabo ka miliyoni 100 z’amadorali ya Leta Zunze Ubumwe za Amerika, akaba anafatwa nk’umuyobozi wa 15 ukize kurusha abandi ku isi. Aka kayabo atunze, ukabaze mu mafaranga y’u Rwanda byarenga 78.000.000.000. Uyu mwami yagiye akunda kunengwa gusesagura no kwinezeza bikabije mu mitungo y’igihugu, cyane ko afite abagore bagera kuri 14 kugeza ubu kandi buri wese amutuza mu nzu ihenze akanamwitaho akoresheje amafaranga atagira ingano.

5) Paul Biya – $200.000.000

JPEG - 159.5 kb

Paul Biya umaze imyaka 34 ayobora igihugu cya Cameroon, afite imutungo ibarirwa muri miliyoni 200 z’amadolari ya Leta Zunze Ubumwe za Amerika, ni ukuvuga asaga 156.000.000.000 uyabaze mu mafaranga y’u Rwanda. Abaturage b’igihugu cye barenga 48% bari mu nsi y’umurongo w’ubukene, nyamara uyu muyobozi anengwa cyane kuba yigwizaho imitungo akanasesagura bikabije.

4) Uhuru Kenyatta – $500.000.000

JPEG - 125.7 kb

Uhuru Kenyatta umaze imyaka itatu ayobora Kenya, ni we uri kuri uru rutonde umaze igihe gito ku butegetsi kandi akaba atarigeze anavugwaho gusahura igihugu cye. Uyu ni umuhungu wa Perezida wa mbere w’iki gihugu Jomo Kenyatta, umutungo we ahanini akaba atarawuhawe n’ubuyobozi bw’iki gihugu, ahubwo akomoka mu muryango ukize kuburyo yanagiye ku butegetsi asanzwe ari umuherwe, dore ko muri 2011, ikinyamakuru Forbes cyamubariraga miliyoni 500 z’amadolari y’Amerika kandi icyo gihe yari ataraba perezida. Kugeza ubu, afite akayabo karenga miliyoni magana atanu z’amadorali ya Leta Zunze Ubumwe za Amerika, ni ukuvuga arenga 390.000.000.000 uyabaze mu mafaranga y’u Rwanda.

3) Teodoro Obiang Nguema Mbasogo – $600.000.000

JPEG - 113.1 kb

Teodoro Obiang Nguema Mbasogo umaze imyaka 37 ayobora igihugu cya Equatorial Guinea, yagiye ku butegetsi mu 1979 ahiritse se wabo Francisco Macias Nguema kuri kudeta (coup d’état). Uyu mukambwe n’umuryango we bafite imitungo myinshi cyane, kuburyo abarirwa miliyoni 600 z’amadorali ya Leta Zunze Ubumwe za Amerika, ni ukuvuga akabakaba 470.000.000.000 uyabaze mu mafaranga y’u Rwanda. Iki gihugu cye kibarirwa mu bihugu bya mbere bikize muri Afrika kubera peteroli gifite, ariko ntibibuza ko hari abaturage batari bacye babayeho mu bukene bukabije.

2) Mohammed VI – $2.500.000.000

JPEG - 87.6 kb

Mohammed VI umaze imyaka 17 ari umwami wa Maroc, uretse kuba ari umwami ni n’umucuruzi ukomeye mu gihugu cye, akaba ari umwe mu baherwe bazwi cyane ku isi. Afite imitungo ibarirwa muri miliyari zirenga ebyeri n’igice z’amadorali ya Amerika. Uyabaze mu mafaranga y’u Rwanda, yarenga 1.950.000.000.000.

1) Jose Eduardo dos Santos – $20.000.000.000

JPEG - 78.5 kb

Jose Eduardo dos Santos umaze imyaka 37 ayobora igihugu cya Angola, niwe mukuru w’igihugu cya Afrika ukize kurusha abandi. Afite akayabo ka miliyari 20 z’amadolari ya Amerika, ni ukuvuga ko uyabaze mu mafaranga y’u Rwanda yarenga 15.600.000.000.000, nyamara abaturage ba Angola bagera kuri 70% batungwa n’amadolari atageze kuri 2 ku munsi. Umukobwa w’uyu mukuru w’igihugu witwa Isabel dos Santos, mu myaka ibiri ishize ikinyamakuru Forbes cyamushyize ku rutonde rw’abaherwe bo muri Afrika, cyane ko we ku giti cye abarirwa miliyari hafi enye z’amadolari y’Amerika, akaba ari nawe mugore ukize kurusha abandi muri Afurika, akanaba umugore w’umwirabura ukize kurusha abandi ku isi yose.

KANDA HANO UREBE VIDEOS UTASANGA AHANDI