Muri Kongo Kinshasa habyukiye myigaragambyo ikaze yahitanye umuntu umwe

Chief Editor | 26-05-2016
Muri Kongo Kinshasa habyukiye myigaragambyo ikaze yahitanye umuntu umwe

Abaturage benshi mu bice bitandukanye bya Repubulika Iharanira Demokarasi ya Kongo, kuri uyu wa Kane tariki 26 Gicurasi 2016 babyukiye mu myigaragambyo yamagana ko Perezida Joseph Kabila yakomeza kuyobora iki gihugu. Kugeza ubu amakuru atangazwa n’ibinyamakuru byo muri iki gihugu, aravuga ko umuntu umwe yapfiriye muri iyi myigaragambyo.

Mu bice bya Kisangani, Kinshasa, Goma n’ahandi hirya no hino muri Repubulika Iharanira Demokarasi ya Kongo, abaturage benshi babyukiye mu myigaragambyo yamagana icyemezo urukiko rukuru ruherutse gufata, ruvuga ko mu gihe amatora yasubikwa, Perezida Joseph Kabila ugiye kurangiza manda yemererwa n’Itegeko Nshinga, yakomeza kuba Perezida.

Muri iyi myigaragambyo, Polisi y’iki gihugu yagerageje guhangana n’abigaragambyaga ibakwizamo ibyuka bihumanya, gusa umuntu umwe akaba yarasiwe mu mujyi wa Goma ahita apfa. Hari kandi n’umupolisikazi wakubiswe bikomeye n’abigaragambyaga bari bitwaje amabuye.

Abaturage bigaragambya, basaba ko hakubahirizwa ibyo amategeko ateganya. Hakurikijwe ibiri mu Itegeko Nshinga rya Repubulika Iharanira Demokarasi ya Kongo, tariki 19 Ukuboza 2016 nibwo Joseph Kabila azaba arangije manda ze ebyeri, bivuga ko guhera tariki 20 Ukuboza 2016, atazaba yemerewe kuba yakwicara mu ntebe y’umukuru w’iki gihugu.

Bisanzwe biteganyijwe ko mu gihe Joseph Kabila yaramuka akomeje kuyobora nyuma y’iyo tariki yavuzwe haruguru, byafatwa nk’ubutegetsi bw’igitugu bwabayeho hirengagijwe ibiteganywa n’Itegeko Nshinga. Nyamara ibi byamaze kwemezwa n’urukiko rw’ikirenga, ruca amarenga ko amatora yari ateganyijwe muri iki gihugu ashobora kuburizwamo, Perezida Kabila agakomeza kuyobora iki gihugu atabitorewe.

KANDA HANO UREBE VIDEOS UTASANGA AHANDI