N’ubwo u Burundi nabwo butorohewe, bwageneye Tanzania imfashanyo itubutse

Chief Editor | 28-09-2016
N’ubwo u Burundi nabwo butorohewe, bwageneye Tanzania imfashanyo itubutse

Igihugu cy’u Burundi ni kimwe mu bihugu bikennye muri Afurika, ibyo bikiyongeraho kuba cyugarijwe n’ibibazo by’inzara yahuriranye n’imvururu zatumye abagera ku 300.000 bari mu buhungiro mu Rwanda no mu bindi bihugu by’abaturanyi. Ibi ariko, ntabyabujije Leta y’iki gihugu kugenera imfashanyo y’ibiribwa bamwe mu baturage ba Tanzania.

Ku rundi ruhande, Tanzania ni kimwe mu bihugu byihagije ku biribwa cyane cyane umuceri, dore ko ibihugu byinshi byo mu karere bitunzwe n’umuceri bigura muri Tanzania. Gusa ibi byose ntibyabujije u Burundi kubafashisha ibiribwa byinshi ngo bagoboke abibasiwe n’umutingito.

Imfashanyo u Burundi bwatanze, igizwe na toni 100 z’umuceri, toni 50 z’ibigori, toni 30 z’isukari na toni 3 n’igice z’icyayi. Iyi mfashanyo bayigeneye abaturage ba Tanzania bo mu ntara ya Kagera baherutse kwibasirwa n’umutingito ugahitana abantu 17, ugasenya amazu ukanangiza ibindi bitandukanye.

JPEG - 84.6 kb

Tanzania yagenewe imfashanyo itubutse n’igihugu cy’u Burundi

Minisitiri w’umutekano w’imbere mu gihugu mu Burundi, Pascal Barandagiye ndetse na Minisitiri Leontine Nzeyimana ushinzwe gukurikirana ibikorwa by’u Burundi mu muryango wa Afurika y’Uburasirazuba, nibo bashyikirije iyi mfashanyo Tanzania kuwa Mbere w’iki cyumweru. Uwayakiriye ku ruhande rwa Tanzania ni Minisitiri ushinzwe umutekano w’imbere mu gihugu.

Minisitiri w’umutekano w’imbere mu gihugu mu Burundi, Pascal Barandagiye, yatangaje ko Tanzania yakunze kuba hafi cyane y’u Burundi mu bihe bibi n’ibyiza, bityo inshuti ikaba nk’umuvandimwe kandi inshuti nyanshuti ukaba ari iyo ubona mu gihe cy’ibyago n’amakuba. Avuga ko umubano w’ibihugu byombi, ari wo watumye u Burundi butirengagiza amakuba bahuye nabo.

KANDA HANO UREBE VIDEOS UTASANGA AHANDI