Nigeria: Intambara yarose mu rugo rwa Perezida, ngo umugore ni uwo mu gikoni no mu buriri

Chief Editor | 15-10-2016
Nigeria: Intambara yarose mu rugo rwa Perezida, ngo umugore ni uwo mu gikoni no mu buriri

Guhangana, guterana amagambo no kwihanangizanya mu ruhame, nibyo birimo kuranga urugo rwa Perezida Muhammadu Buhari wa Nigeria n’umugore we Aisha Buhari. Umugabo yatangiye no gukomoza kuri amwe mu mabanga y’urugo.

Mu gihe Perezida Muhammadu Buhari ari mu ruzinduko mu gihigu cy’u Budage, umugore we yamwibasiye batari kumwe mu kiganiro yagiranye na BBC, atangaza ko kubera imikorere mibi ya Guverinoma ye, atazongera kumushyigikira mu matora ya Perezida ataha azaba mu mwaka wa 2019, keretse nahindura abagize Guverinoma.

Aisha Buhari yatangaje ko Guverinoma ya Nigeria yigaruriwe n’agatsiko k’abantu bacye bakora ibyo bishakiye Perezida ari nawe mugabo we arebera. Yavuze kandi ko abari muri Guverinoma ye nawe atabazi, atazi n’imikorere yabo.

Muhammadu Buhari nawe aho ari mu gihugu cy’u Budage, mu kiganiro yagiranye n’abanyamakuru ari kumwe na Angela Merkel, yasetse cyane ibyo ashinjwa n’umugore we, anatangaza amagambo akomeje kuvugisha benshi muri Nigeria.

Muhammadu Buhari ati: "Sinzi ishyaka rya Politiki umugore wanjye abarizwamo, gusa abarizwa mu gikoni cy’iwanjye, akabarizwa mu cyumba cy’uburiri turaramo, ndetse hari n’ikindi cyumba kimwe abarizwamo."

Perezida Muhammadu Buhari watowe umwaka ushize afite imihigo yo gukemura ikibazo cya ruswa n’ikimenyane muri Guverinoma ye, ashinjwa n’umugore we Aisha kuba ntacyo yitaho kugeza ubwo abayobozi bakuru bashyirwaho mu kavuyo.

Aisha Buhari ati: "Perezida ntazi n’abantu 45 muri 50 bahawe imyanya, nanjye simbazi kandi ndi umugore we tumaranye imyaka 27 yose... Bamwe mu bo yashyizeho baricara iwabo, bakagena abantu babo bazayobora ibigo n’indi myanya ikomeye muri za Minisiteri."

Aisha Buhari, mu mwaka ushize wa 2015 yagize uruhare rugaragara mu kwamamaza umugabo we no kumufasha kwegukana intsinzi, agasimbura Goodluck Jonathan. Yakoranyije amahuriro y’abagore n’urubyiruko, amubera imbaraga zidasanzwe zatumye yegukana intsinzi.

Ni umugore ukunzwe n’abaturage ba Nigeria, ariko byatunguranye mu minsi ishize ubwo yabuzwaga gukora ibikorwa byo guteza imbere abagore no gufasha abagizweho ingaruka n’ibikorwa bya Boko Haram mu gace akomokamo k’Amajyaruguru y’Uburasirazuba.

Aisha Buhari yotsa igitutu umugabo we, avuga ko atumva ukuntu yananiwe gushyira mu myanya abayobozi bashoboye kandi bateza imbere igihugu, akemera ko agatsiko k’abantu bacye bamushyigikiye mu matora, bajya bashyira mu myanya bene wabo batanagendeye ku bushobozi bafite.

Uyu mugore agaragaza ko ubukungu bwa Nigeria bwazahajwe n’iyi miyoborere mibi y’umugabo we, ibi akabishingira ku kuba ubu bukungu bwaramanutse ku kigero butigeze bubaho mu myaka 10 ishize.

Aisha Buhari wavutse tariki 17 Gashyantare 1971 muri Leta ya Adamawa muri Nigeria, yashakanye na Muhammadu Buhari mu 1989, bakaba bafitanye abana batanu, umuhungu umwe n’abakobwa bane. Azwi cyane nk’impirimbanyi y’uburenganzira bwa muntu, kandi yagiye afasha cyane abibasiwe na Boko Haram. Aisha Buhari w’imyaka 45 y’amavuko, arushwa n’umugabo we Muhammadu Buhari imyaka 23.

KANDA HANO UREBE VIDEOS UTASANGA AHANDI